पहिले आप्रवासी भिसा जारी भएर अमेरिका आउन नपाएकालाई नयाँ आप्रवासी भिसामा अन्तरवार्ता छुट
प्रकाशित मिति : मंसिर २५, २०७८ शनिबार
पहिले आप्रवासी भिसा जारी भएर कुनै कारणवश अमेरिका आउन नपाएकाहरुले पुन आप्रवासी भिसाको आवेदन दिएको खण्डमा उनीहरुलाई भिसा अन्तरवार्तामा छुट दिइने भएको छ । अमेरिकी सरकारको विदेश मन्त्रालयले डिसेम्बर १३ बाट लागु हुनेगरी यो अन्तिम तर अस्थायी नियमको घोषणा गरेको हो ।
यो नियम सन् २०२३ को डिसेम्बर १३ सम्म लागु हुनेछ । सन् २०१९ को अगस्त ४ पछि आप्रवासी भिसा स्वीकृत भएकाहरुका सन्दर्भमा मात्र यो नियम लागु हुनेछ । त्यसभन्दा अगाडि आप्रवासी भिसा स्वीकृत भएकाहरुले भने भिसा अन्तरवार्ताको प्रकृयामार्फत नै जानुपर्ने जनाइएको छ । योग्य आप्रवासी भिसा आवेदकहरु दूतावास वा कन्सुलेटमा भिसा अन्तरवार्ताका लागि उपस्थीत हुन नपर्ने र थप जानकारी आवश्यक परेमा फोन वा इमेलमार्फत समेत मागिने जनाइएको छ ।
विगतमा आप्रवासी भिसा स्वीकृत भएकै श्रेणीमा नयाँ आप्रवासी भिसा लिनु परेको खण्डमामात्र भिसा अन्तरवार्तामा छुट दिइनेछ । तर मूल आवेदकको मृत्यु भएको वा मूल आवेदकले अमेरिकी नागरिकता लिएको खण्डमा स्वत आप्रवासी भिसाको श्रेणी परिवर्तन भएको खण्डमा पनि त्यस्ता आवेदकलाई अन्तरवार्तामा छुट दिइनेछ । त्यस्तै पहिले स्वीकृत भएको पेटिसनका आधारमा नयाँ आप्रवासी भिसा लिनेहरुलाई पनि अन्तरवार्तामा छुट दिइनेछ ।
कोरोनाको महामारी कम भएपछि यो नियम आवश्यक नपर्ने अमेरिकी विदेश मन्त्रालयको ठहर छ । २४ महिना आवेदनहरु प्रकृयामा लैजानका लागि प्रयाप्त समत भएको विदेश मन्त्रालयको विश्वास रहेको छ । कोरोनाको महामारीका कारण उत्पन्न कठिनायी र बेलाबेलामा विभिन्न देशहरुमाथि लगाइएका यात्रा प्रतिबन्धहरुका कारण विगतमा आप्रवासी भिसा प्राप्त गरेकाहरु पनि अमेरिका आउन पाएका थिएनन् । भिसा प्राप्त गरेको ६ महिनाभित्र अमेरिका आउनुपर्ने भएकाले उक्त अवधिमा अमेरिका आउन नसकेकाहरुका लागि नयाँ आप्रवासी भिसाको आवेदन आवश्यक पर्छ । उनीहरुलाई नै अन्तरवार्तामा छुटको घोषणा गरिएको हो ।
विगतमा आप्रवासी भिसा लिएर भिसा अवधिभित्र अमेरिका आउन नसकेकाहरुले नयाँ भिसाका लागि आवेदन दिंदा डीएस २६० वा डीएस २३० फर्म भर्नुपर्छ भने नयाँ शुल्क समेत तिर्नुपर्छ । नयाँ नियमले भर्नुपर्ने फर्म र शुल्कका सन्दर्भमा भने कुनै परिवर्तन गरेको छैन । अहिले अमेरिकी दूतावास र कन्सुलेटहरुमा विभिन्न प्रकारका भिसाको उच्च माग र ठूलो ब्याकलग रहेको सन्दर्भमा यो नियमले केही राहत अनुभव हुने अपेक्षा गरिएको छ ।
सन् २०१९ को अगस्त ४ देखि सन् २०२१ को सेप्टेम्बर ३० सम्म आप्रवासी भिसा पाएका झण्डै ४९ हजार आप्रवासीहरु अमेरिका आएका छैनन् । सन् २०१९ को अगस्त ४ देखि सन् २०२१ को मे ३१ सम्म भिसा पाएका झण्डै ११ हजारको आप्रवासी भिसा अवधि समाप्त भइसकेको छ भने उनीहरु अमेरिका आएका छैनन् । सन् २०१९ को अगस्त ४ देखि सन् २०२१ को सेप्टेम्बर ३० सम्म अमेरिका आउने क्रममा कम्तीमा २४४ जनालाई विमानस्थलबाट अमेरिका प्रवेश नदिई फिर्ता पठाइएको छ । उनीहरुमध्ये कैयन समेत नयाँ भिसाका लागि योग्य हुने विदेश मन्त्रालयको भनाई छ ।