अमेरिकाभित्र हुने एसाइलीका दम्पत्ति र छोराछोरीले अनिवार्य अन्तरवार्ता दिनुपर्ने नियम खारेज
प्रकाशित मिति : मंसिर २४, २०७८ शुक्रबार
युएससीआईएसले अमेरिकामा एसाइलम स्वीकृत भएका वा शरणार्थी स्टाटस स्वीकृत भएका व्यक्तिका दम्पत्ति र २१ बर्षभन्दा कम उमेरका छोराछोरीहरुका लागि आई ७३० आवेदन फाइल गर्दा अन्तरवार्ता अनिवार्यको नियम खारेज गरेको छ । सन् २०२० को नोभेम्बरमा ल्याइएको नीति अनुशार अमेरिकाभित्र हुने सबै आई ७३० आवेदनका सन्दर्भमा अन्तरवार्ता अनिवार्यको नियम ल्याइएको थियो ।
विगतमा एसाइलम गरेका व्यक्तिका परिवार अमेरिकामा नै भएको खण्डमा उनीहरुले ग्रिनकार्ड प्राप्त गर्नका लागि युएससीआईएसका अधिकारीसमक्ष थप अन्तरवार्ता दिनु नपर्ने र मुख्य आवेदकको एसाइलम आवेदन स्वीकृत भएको खण्डमा मुख्य आवेदकसँगै उसका श्रीमान् वा श्रीमति र छोराछोरीहरुले ग्रिनकार्ड प्राप्त गर्न सक्ने भएपनि गतबर्षदेखि भने मुख्य आवेदकको एसाइलम स्वीकृत भएको खण्डमा पनि उसका श्रीमान् वा श्रीमति र छोराछोरीहरुले ग्रिनकार्ड प्राप्त गर्नका लागि युएससीआईएसका अधिकारीहरुसमक्ष अन्तरवार्ता दिनुपर्ने नियम ल्याइएको थियो । यदि अन्तरवार्ताका क्रममा मुख्य आवेदकले सुरुमा पेश गरेका विवरणहरु बाझिएमा युएससीआइएसले ग्रिनकार्ड स्वीकृत नगर्न सक्ने सम्भावना थियो ।
उक्त नियम आजैदेखि लागु हुनेगरी तत्काल खारेज गरिएको छ । अब अमेरिकाभित्र हुने एसाइली वा शरणार्थी स्टाटस प्राप्त व्यक्तिका दम्पत्ति र २१ बर्षभन्दा कम उमेरका छोराछोरीहरुले विना अन्तरवार्ता नै प्राथमिक आवेदकमा आधारित एसाइली वा शरणार्थीको स्टाटस प्राप्त गर्न सक्नेछन् ।
अमेरिकाभित्र हुने आई ७३० आवेदकलाई अन्तरवार्ता आवश्यक भए नभएको निर्धारण गर्न पहिलेकै जस्तो केस अनुशार निर्धारण गरिने युएससीआईएसले जनाएको छ । आवश्यक आवेदनका सन्दर्भमा युएससीआईएसले अन्तरवार्ताका लागि बोलाउन सक्नेछ भने अन्य आवेदनमा अन्तरवार्ता छुट दिइनेछ ।
युएससीआईएसले सबैलाई अन्तरवार्ता अनिवार्य गर्ने नियमबेगर पनि जालजासी रोक्ने लगायत कडा सुरक्षा जाँच गर्नसक्ने जनाएको छ । कुनै आवेदकका सन्दर्भमा अन्तरवार्ता आवश्यक भएमा भने त्यस्तो अन्तरवार्ता लिन पाउने अधिकार युएससीआईएसमा सुरक्षित रहेको छ ।
अमेरिकामा एसाइली वा शरणार्थीको स्टाटस प्राप्त गरिसकेका व्यक्तिले छोराछोरी र दम्पत्तिका लागि आई ७३० आवेदन फाइल गर्दा उनीहरु प्राथमिकत एसाइली वा शरणार्थीसरह अलग्गै योग्य हुनु पर्दैन । तर उनीहरुले प्राथमिक आवेदकसँगको सम्बन्ध भने पुष्टी गर्नुपर्छ । साथै सुरक्षा पृष्ठभूमि लगायतका जाँच पनि उत्तिर्ण गर्नुपर्छ ।
अमेरिकाबाहिर हुनेहरुका सन्दर्भमा भने दूतावास वा कन्सुलेटमा अन्तरवार्ता आवश्यक पर्नेछ । सन् २०१८ देखि अमेरिकाभित्र हुनेलाई अन्तरवार्ता आवश्यकको नियम ल्याइएपनि सन् २०२० को नोभेम्बरसम्म अन्तरवार्ता अनिवार्य गरिएको थिएन । तर गतबर्षको नोभेम्बरबाट अमेरिकाभित्र हुनेहरुलाई पनि अन्तरवार्ता अनिवार्यको नियम ल्याइएको थियो ।