Follow @khasokhasmag

मेरिल्याण्डमा गाडीको ठक्करबाट आईओएममा कार्यरत नेपाली महिला बर्खा खड्का प्रसाईको निधन


प्रकाशित मिति : मंसिर ७, २०७८ मंगलबार

अमेरिकाको मेरिल्याण्डको प्रिन्स जर्ज काउन्टीमा गाडीको ठक्करबाट ४० बर्षीया नेपाली महिला बर्खा खड्का प्रसाईको निधन भएको छ । सपर्स वे मा मेडिकल सेन्टर ड्राइभ पार गर्न लाग्दा प्रसाईलाई गाडीले ठक्कर दिएको थियो भने गाडी सहित घटनास्थलबाट फरार चालकलाई पछि प्रहरीले नियन्त्रणमा लिइसकेको छ । घटना सोमबार बेलुका ७ बजे भएको थियो ।

तत्कालै नजिकको अस्पतालमा लगिएपनि अस्पतालले उनलाई मृत घोषणा गरेको थियो । नेपालमा झापाको बुद्धशान्ती गाउँपालिका स्थायी घर भएकी प्रसाई अमेरिकाको मेरिल्याण्डमा नै बस्दै आएकी थिइन् ।

इन्टरनेशल अर्गनाइजेशन फर माइग्रेशन आईओएममा कार्यरत प्रसाई दुईमहिना अगाडिमात्र आईओएम अन्तरगत अमेरिकामा काम गर्नका लागि आएकी थिइन् । सुरुमा अफगानिस्तानबाट आएका शरणार्थीहरुको कामका लागि भर्जिनियाको फोर्टलीमा रहेको आर्मी क्याम्पमा खटाइएको थियो ।

आफ्ना श्रीमान मदन प्रसाईका साथमा बर्खा खड्का प्रसाई

उनको अवधि थप गरेर मार्चसम्मका लागि वासिंटन डिसीमा रहेको आईओएम मुख्यालयमा खटाइएको थियो । गतसातादेखिमात्र वासिंटन डिसीको मुख्यालयमा काम गर्न थालेको पारिवारिक श्रोतले जनाएको छ । प्रसाईलाई मेरिल्याण्डमा आफन्तकोमा बसेर घर फर्कने क्रममा ट्रेनबाट निस्केर बाटो क्रस गर्नलाग्दा गाडीले ठक्कर दिएको हो ।

अन्तर्राष्ट्रिय संघसंस्थामा कार्यरत कर्मचारीहरुलाई प्रदान गरिने जी भिसामा अमेरिकी आएकी बर्खा खड्का प्रसाईका श्रीमान मदन प्रसाई नेपालमै रहेका छन् । शव नेपालमा नै पठाउने तयारी भइरहेको र भोलि फ्युनेरल होममा लगिने पारिवारिक श्रोतले जानकारी दिएको छ । पारिवारिक श्रोत अनुशार शव नेपाल पठाउनका लागि मेरिल्याण्ड राज्यका सांसद ह्यारी भण्डारीले सहयोग गरिरहेका छन् ।

आफ्नो कान्छो भाईको श्रीमतीको दुर्घटनामा दुखद निधन भएको खबरले आफूहरु स्तब्ध भएको न्युयोर्क निवासी मुकेश प्रसाईले खसोखासलाई बताए ।

   न्युयोर्क स्टेट, डिपार्टमेन्ट अफ स्टेट, डिभिजन अफ कर्पोरेशन, दर्ता नम्बर: ५२५५२५८

नमस्ते मिडिया इन्क.

न्युयोर्क, अमेरिका

© 2021 KHASOKAHS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com