२०११ अगाडि अमेरिका आएका कागपत्रविहिनलाई १० बर्षे वर्क परमिट दिने विधेयक हाउसबाट पारित
प्रकाशित मिति : मंसिर ३, २०७८ शुक्रबार
सन् २०११ अगाडि अमेरिकामा आएका कागजपत्रविहिनहरुलाई १० बर्षको वर्क परमिट प्रदान गर्ने प्रावधानसहितको सामाजिक खर्च विधेयक आज अमेरिकी संसदको तल्लो सदन प्रतिनिधिसभाबाट पारित भएको छ । प्रतिनिधिसभामा विधेयकका पक्षमा २२० र विपक्षमा २१३ मत खसेको थियो ।
यो विधयेकमा समावेश गरिएको अध्यागमन सुधार प्याकेजलाई विगत ३५ बर्षयताकै सबैभन्दा बृहत अध्यागमन सुधार प्याकेज भनिएको छ । रोनाल्ड रेगनका पालापछि आएको बृहत सुधार प्याकेजका रुपमा यसलाई हेरिएको छ । सन् २०११ भन्दा अगाडि अमेरिका आएका कागजपत्रविहिनलाई अमेरिकी नागरिकताको बाटोमा लैजाने प्रारम्भिक लक्ष्यभन्दा कम सुविधासहितको वर्क परमिटको प्रावधान प्याकेजमा राखिएको छ ।
यो प्रावधानमा व्यवस्था गरिएको अध्यागमन सुविधा अनुशार कागजपत्रविहिनहरु सुरुको ५ बर्षसम्म परोल प्रकृयामार्फत वर्क परमिट लिएर अमेरिकामा देशनिकालाको डरविना बस्न पाउनेछन् । अर्को ५ बर्षको अवधि थप गर्न सकिनेछ । यो मापदण्डबाट अमेरिकामा रहेका ६५ लाख कागजपत्रविहिन आप्रवासीहरुलाई सिधा फाइदा पुग्नेछ ।
त्यस्तै अमेरिकी नागरिकका आफन्तहरुलाई अस्थायी स्टाटसबाट ग्रिनकार्डको बाटोमा लैजान समेत बाटो खुल्नेछ । यो बिलमा भिसा रिक्याप्चरको प्रावधान समेत समेटिएको छ । जस अन्तरगत सन् १९९२ देखि खेर गएका भिसाहरु पुन प्रयोग गर्न मिल्नेछ भने विदेशमा रहेर ग्रिनकार्डको प्रतिक्षा गरिरहेकाहरुलाई अमेरिका आउने बाटो छिटो हुनेछ । लामो समयदेखि ब्याकलगमा रहेका रोजगारमा आधारित र परिवारमा आधारित ग्रिनकार्डवाहकले अतिरिक्त शुल्क तिरेर आफ्नो आवेदन अगाडि बढाउन सक्नेछन् ।
प्रतिनिधिसभाबाट पारित विधयेकमा अध्यागमनबारेको विषय अत्यन्तै कममात्र समावेश गरिएको छ । यो विधयेक अब सिनेटमा मेलमिलापको नियम अन्तरगत बजेट प्रकृयाबाट पारित गर्नका लागि पेश गरिनेछ । यसो गर्दा सिनेटमा रिपब्लिकनको सहायताविना पनि यो बिल फिलिबस्टर मतको साटो सामान्य बहुमतबाट पारित गर्न सम्भव हुनेछ ।
विगतका दुईवटा अध्यागमन प्रस्तावहरु बजेट प्रकृयाबाट पारित हुनका लागि योग्य नभएको भन्दै पार्लियामेन्टेरियनबाटै अस्वीकृत भएका थिए । ती प्रस्तावमा कागजपत्रविहिन लगायतलाई ग्रिनकार्डको बाटोमा लैजाने लगायतका प्रावधानहरु समेटिएको थियो ।