दुई समुदायबीचको विवादले जनकपुर तनावग्रस्त: प्रशासनद्वारा निषेधाज्ञा घोषणा
प्रकाशित मिति : कार्तिक २७, २०७८ शनिबार
जनकपुरधाममा छठ पर्वमा अर्घ्य दिनका लागि बनाउने भनिएको घाटको विषयमा हिन्दूवादी संगठन र स्थानीय इस्लालाम धर्मालम्बबीच चलेको विवादले उग्ररूप लिएपछि अवस्था तनावपूर्ण बनेको छ । अवस्था नियन्त्रणमा आउन नसकेपछि जिल्ला प्रशासन कार्यालय धनुषाले निषेधाज्ञा नै जारी गरेको छ ।
शनिबार हिन्दुवादी संगठनको समूह जनकपुरधामबाट प्रदर्शन गर्दै रुपैठा पुगेपछि स्थिति तनावपूर्ण बनेको थियो । तनावपूर्ण स्थितिलाई स्थितिलाई नियन्त्रणमा लिन प्रहरीले कयौँ राउण्ड अश्रुग्याँस प्रहार गरेको छ भने झडपको क्रममा दुई जना प्रहरीसहित तीन जना घाइते भएका छन् ।
तनावपूर्ण स्थितिलाई मध्यनजर गर्दै जिल्ला प्रशासनले जनकपुरधाम जटही सडक खण्ड पूर्णरुपमा प्रहरीले निषेधाज्ञा जारी गरेको छ । प्रमुख जिल्ला अधिकारी बन्धुप्रसाद बास्तोलाले विज्ञप्ति मार्फत भेला जुलुस, प्रदर्शन, घेराउ, र्याली, सभा जस्ता क्रियाकलाप गर्न नपाउने गरी मिति ०७८ कार्तिक २७ देखि दिउँसो २ बजेदेखि कार्तिक २८ को राति १० बजेसम्मका लागि निषेधाज्ञा आदेश जारी गरेको जनाएका छन् ।
जनकपुरधाम उपमहानगरपालिका वडा नम्बर २० मा रहेको देवपुरा रुपैठास्थित तेलिया पोखरीमा छठ पूजाको लागि घाट निर्माण गर्ने विषयमा स्थानीय मुस्लिम समुदायले अवरोध गरेपछि विवाद सुरु भएको थियो । उक्त विवादलाई लिएर शनिबार हिन्दुवादी संगठन विरोधमा उत्रेको थियो ।