कोरोना महामारीका कारण अमेरिकी भिसा अस्वीकृत भएकालाई दोश्रो मौका दिइने
प्रकाशित मिति : कार्तिक २७, २०७८ शनिबार
कोरोना महामारीका कारण अमेरिकी भिसा अस्वीकृत भएकालाई दोश्रो मौका दिइने भएको छ । अमेरिकाले यात्रा प्रतिबन्ध लगाएका मुलुकमा विगत १४ दिनभित्र उपस्थीत भएका कारण भिसा अस्वीकृत भएकाहरुलाई दोश्रो मौका दिइने अमेरिकी सरकारको विदेश मन्त्रालयले जनाएको छ ।
नोभेम्बर ८ देखि कोरोनाबिरुद्धको भ्याक्सिन लगाएकाहरुलाई अमेरिका प्रवेश दिने नयाँ नीतिको कार्यान्यनसँगै अमेरिकी दूतावासहरुले विगतमा कोरोना सम्बन्धित यात्रा प्रतिबन्ध लगाइएका देशहरुमा पनि भिसा प्रकृयामा लैजान सुरु गरेका हुन् । ब्राजिल, चीन, इरान, आयरल्याण्ड, भारत, शेंगेन क्षेत्र, दक्षिण अफ्रिका र यूके लगायतका देशमा विगत १४ दिन उपस्थीत भएका कारण भिसा अस्वीकार भएकाले अब अन्तरवार्ताको नयाँ मिति पाउने भएका छन् ।
कोरोना कारण भिसा अस्वीकृत भएकाहरुले आवेदन पुनर्विचारका लागि सम्बन्धित अमेरिकी दूतावास वा कन्सुलेटमा सम्पर्क गर्नुपर्ने विदेश मन्त्रालयले जनाएको छ । त्यसपछि उनीहरुलाई अन्तरवार्ताको नयाँ मिति दिइनेछ भने उनीहरुले भिसा प्राप्त गर्नसक्नेछन् ।
यद्यपी सबै दूतावास र कन्सुलेटहरु अहिले नै भिसाको नयाँ अन्तरवार्ता दिने स्थीतिमा नभएको जनाइएको छ । नोभेम्बर ८ देखि लागु नियमको अर्थ स्थानीय दूतावास वा कन्सुलेटहरु तत्कालै नयाँ भिसा अन्तरवार्ता तय गर्न सक्षम हुने भन्ने नरहेको विदेश मन्त्रालयको सुचनामा उल्लेख छ ।
कसरी गैर आप्रवासी भिसाका लागि आवेदन दिने भन्ने सन्दर्भमा सम्बन्धित दूतावास वा कन्सुलेटको वेवसाइट हेर्न सुझाव दिइएको छ । सम्बन्धित दूतावास वा कन्सुलेटको वेवसाइटमा कुन सेवा संचालन भइरहेको भन्नेबारे जानकारी उपलब्ध हुने भएकाले त्यसै अनुशार भिसाको अन्तरवार्ता तय गर्न सुझाव दिइएको छ ।