साफमा पहिलोपटक फाइनलमा पुगेको नेपालको उपाधि जित्ने सपना भारतबाट चकनाचुर
प्रकाशित मिति : आश्विन ३०, २०७८ शनिबार
साफमा फाइनल खेल्नु र पहिलो हाफमा रोक्नसक्नुलाई नेपाली टिमको उपलब्धी मानिएको छ ।
साफ च्याम्पियनशिप फुटबलमा पहिलो पटक फाइनल खेलेको नेपाल भारतसँग पराजित भएपछि उपाधि जित्ने सपना चकनाचुर भएको छ । माल्दिभ्सको राष्ट्रिय रङ्गशालामा भएको खेलमा भारतले नेपाललाई ३-० ले पराजित गरेको छ ।
खेल सुरु हुनुभन्दा अगाडि नै नेपालका कुवेती प्रशिक्षक अब्दुल्ला अल मुताइरीलाई मैदानमा जान नपाउने नियम लगाइदा नेपाली टोलीको मनोबल खस्किएको थियो। निरन्तर वर्षाका माझ सुरु भएको खेलमा नेपालले उत्कृष्ट खेल्न सकेन।
नेपालले जारी प्रतियोगितामा दुवै खेल भारतसँग मात्रै हारेको हो। भारतले दुई मिनेटको बीचमा दुई गोल गरेको थियो । भारतीय कप्तान सुनिल क्षेत्रीले गोल गरेको दोस्रो मिनेटपछि नै सुरेश सिंह वाङजामले गोल थपेपछि खेल नेपालको नियन्त्रणभन्दा बाहिर गएको थियो। त्यसपछि आक्रमणमा जोड दिइरहेकोको नेपालको लागि इन्जुरी समयमा साहल अब्दुल समादले गोल गरेका थिए।
नेपालले भारतलाई पहिलो हाफमा गोलरहित बराबरीमा रोक्न सक्नु नै नेपालको सफलता बन्यो । दुई पहेँलो कार्ड खाएकोले अञ्जन विष्टको फाइनलमा अनुपस्थिती पनि नेपाली टोलीका लागि ठूलो घाटा हुन पुगेको थियो। नेपालका प्रशिक्षक अल मुताइरीलाई आयोजकले दुई पहेँलो कार्ड पाएको भन्दै फाइनल खेल खेलाउनबाट वञ्चित गरिएको थियो ।
जबकि खेलाडीहरूबाहेक प्रशिक्षकको हकमा त्यस्तो नियम थिएन। प्रशिक्षकहरूले यो विषयमा विरोध गर्नुका साथै अन्तर्राष्ट्रिय न्यायालय कोर्ट अफ आर्विट्रेसनमा मुद्दा हाल्ने जनाएका छन्।
प्रतियोगिताको फाइनल खेल्नु नै नेपाली फुटबलको लागि ऐतिहासिक उपलब्धि रहेको छ । यसअघि पाँच पटक सेमीफाइनलमा पुगे पनि नेपाल कहिल्यै पनि शीर्ष दुई स्थानमा उक्लिन सकेको थिएन।
सबै फोटो: एन्फा