अमेरिकी पासपोर्ट नविकरणमा साढे ४ महिनाभन्दा बढी
प्रकाशित मिति : असार २९, २०७८ मंगलबार
पछिल्लो समय अमेरिकी पासपोर्ट नविकरणमा अत्यन्तै लामो समय लाग्ने गरेको छ । विदेशको यात्रा गर्न चाहने कतिपय अमेरिकनहरुको पासपोर्ट नविकरण हुन साढे ४ महिनाभन्दा पनि लामो समय लागिरहेको छ ।
अन्तर्राष्ट्रिय यात्राको क्रम बढ्दै जाँदा निकट भविश्यमा पासपोर्टको म्याद सकिन लागेका अमेरिकनहरु पासपोर्ट नविकरणका भएको ढिलाईका कारण चिन्तित बनेका छन् । अमेरिकी विदेश मन्त्रालय र हुलाकहरुले गरेको ढिलाई कारण पासपोर्ट नविकरण गर्न चाहने कैयन आवेदकहरु जनप्रतिनिधिहरुको ढोकामा समेत पुगेका छन् ।
कतिपय पासपोर्ट अप्वाइन्ट नपाएका कारण दुर्लभ अप्वाइन्टमेन्ट लिनका लागि अन्य राज्यमा यात्रा गर्न बाध्य भएका छन् । अहिले पासपोर्ट प्राप्त गर्न लाग्ने समयअवधि महामारी अगाडिको तुलनामा निकै लामो भएको छ । हुलाकको प्रकृयामा ६ हप्तासम्म र पासपोर्ट आवेदन प्रकृयामा १२ हप्तासम्म गरी अहिले १८ हप्तासम्म लाग्ने अमेरिकी विदेश मन्त्रालयले जनाएको छ ।
शीघ्र प्रकृया अपनाइएका पासपोर्टमा समेत १२ हप्तासम्म लाग्ने गरेको छ । आपतकालिन अवस्थामा यात्रा गर्नुपर्ने भएमा तीनदिनभित्र पासपोर्ट प्राप्त गर्न सकिनेछ । तर त्यसका लागि आगामी ७२ घण्टाभित्र आपतकालिन यात्रा गर्नुपर्ने अवस्था हुनुपर्नेछ । त्यसका लागि अप्वाइन्टमेन्ट लिन जरुरी हुन्छ । तर त्यस्ता अप्वाइन्टमेन्टहरु अत्यन्तै सिमित भएकाले पाउन मुस्किल रहेको छ ।
अहिले आवेदन पठाइसकेपछि पनि ६ हप्तासम्म अनलाइनमा स्टाटस हेर्दा ‘नट अभाइलेवल’ देखिन सक्नेछ । तर यस्तो अवस्थामा चिन्तित नहुन र आवेदन तथा कागजातहरु सुरक्षित तरिकाले बाटोमा आउँदै गरेको हुने अमेरिकी विदेशमन्त्रालयको भनाई छ । ६ साताको अवधिमा आवेदन सम्बन्धित स्थानमा पुग्ने, पेमेन्ट प्रकृयामा लगिने र आवेदन प्रणालीमा प्रवेश गर्ने भएकाले त्यसपछिमात्र अनलाइनमा चेक गर्दा ‘इन प्रोसेस’ देखिनेछ ।