लकडाउनकै बीच ‘मे’मा अमेरिकी दूतावास काठमाडौंबाट ३५४ लाई भिजिटर भिसा, कुन श्रेणीमा कति?
प्रकाशित मिति : असार २६, २०७८ शनिबार
अमेरिकी दूतावास काठमाडौं
अमेरिकी दूतावास काठमाडौंले अप्रिलको अन्तिमबाट सबै आप्रवासी र गैर आप्रवासी भिसा अप्वाइन्टहरु रद्द गरेको थियो । लकडाउनका कारण अमेरिकी दूतावास काठमाडौंमा सबै भिसा अप्वाइन्टमेन्ट रद्द गरिएपनि भिजिटर भिसा नविकरण भने जारी राखेको थियो ।
त्यस्तै आपतकालिन अवस्थामा यात्रा गर्नुपर्नेहरुका लागि पनि भिसा जारी गरिएको थियो । सबै नियमित भिसा अप्वाइन्टमेन्ट रद्द गरिएपनि मे महिनामा अमेरिकी दूतावास काठमाडौंले ३५४ जनालाई भिजिटर भिसा जारी गरेको तथ्यांक अमेरिकी विदेश मन्त्रालय ब्यूरो अफ कन्सुलर अफेयर्सले आज सार्वजनिक गरेको छ । यीमध्ये अधिकांश विगतमा भिजिटर भिसा भएकाहरुको भिसा नविकरण गरिएको हो ।
यी बाहेक काठमाडौं दूतावासले मे महिनामा अन्य ३४ जनालाई गैर आप्रवासी भिसा जारी गरेको छ । जसमा अमेरिकी नागरिकका मंगेतर ८ जना रहेका छन् भने विद्यार्थी भिसा पाउनेहरु २ जना रहेका छन् । कूटनीतिज्ञहरु ५ जना र तोकिएका अन्तर्राष्ट्रिय संस्थाहरुमा काम गर्ने १२ जनालाई भिसा जारी गरिएको थियो ।
मे महिनामा काठमाडौं दूतावासले भिसा अप्वाइन्ट स्थगित गरेपछि कतिपय नेपालीले भारतमा रहेका अमेरिकी दूतावासबाट समेत गैर आप्रवासी भिसाहरु लिएका थिए । त्यसैले विश्वभरबाट मे महिनामा भिजिटर भिसा लिने नेपालीहरुको संख्या ३ सय ८८ रहेको छ ।
अमेरिकी दूतावास काठमाडौंले २ जनालाई विद्यार्थी भिसा जारी गरेपनि अन्य दूतावासबाट अरु २० जना नेपालीहरुले मे महिनामा विद्यार्थी भिसा लिएका छन् ।
मे महिनामा अन्तर्राष्ट्रिय संगठनमा काम गर्ने नेपाली कर्मचारीहरु कुल ३२ जनाले जी श्रेणीको भिसा लिएका थिए ।
अमेरिकी दूतावास काठमाडौंले अझै पनि नियमित भिजिटर भिसा जारी गर्न भने सुरु गरेको छैन । यद्यपी पहिले नै भिसा भएकाहरुको भिजिटर भिसा विना अन्तरवार्ता नविकरण गर्न भने जारी नै राखेको छ । त्यस्तै सिमित संख्यामा विद्यार्थी भिसाका अप्वाइन्टमेन्ट पनि अमेरिकी दूतावास काठमाडौंले दिइरहेको छ ।
नियमित भिसा सेवा कहिलेदेखि सुचारु हुने भन्नेबारे अझै निश्चित छैन । तर आपतकालिन अवस्थामा तत्काल यात्रा गर्नुपर्ने भएमा भने आपतकालिन भिसा अप्वाइन्टमेन्टका लागि अनुरोध गर्न सकिन्छ ।