नेपाली विद्यार्थीलाई २ बर्षभन्दा लामो अमेरिकी भिसा नदिने प्रस्तावित नियम फिर्ता
प्रकाशित मिति : असार २६, २०७८ शनिबार
अमेरिकी सरकारले अमेरिकामा पत्रकार, एक्सचेन्ज भिजिटर र विद्यार्थी भिसामा आउनेलाई अब विमानस्थलमा डीएस अर्थात् ड्युरेशन अफ स्टाटस नदिई फर्कनुपर्ने मिति नै उल्लेख गर्ने प्रस्तावित नियम फिर्ता गरेको छ । गत सेप्टेम्बर २५ मा प्रस्तावित नियम फेडेरल रजिष्टरमा प्रकाशित गरिएको थियो । जसमा ३० दिनको कमेन्ट अवधि तोकिएकोमा झण्डै ३२ हजार कमेन्टहरु प्राप्त भएका थिए ।
कमेन्ट गर्नेहरुमा ९९ प्रतिशतभन्दा धेरैले यो प्रस्तावित नियमको विरोध गरेको र कैयनले यो नियम फिर्ता गर्न माग गरेको डिपार्टमेन्ट अफ होमल्याण्ड सेक्युरिटीले जनाएको छ । १ प्रतिशतभन्दा कमलेमात्र यो प्रस्तावित नियमको समर्थन गरेको जनाइएको छ । यी कमेन्टहरुका आधारमा र राष्ट्रपति जो बाइडेनले जारी गरेको कार्यकारी आदेशका आधारमा यो प्रस्तावित नियम फिर्ता गरिएको डिपार्टमेन्ट अफ होमल्याण्ड सेक्युरिटीले जनाएको छ ।
प्रस्तावित नियममा के थियो ?
अहिलेसम्म पत्रकारको आईभिसा, एक्सचेन्ज भिजिटर र विद्यार्थीको एफ भिसाका लागि अमेरिका छिर्दा फर्कने मिति उल्लेख नगरी स्टाटस कायम गरुन्जेल बस्न मिल्ने उल्लेख गरिदै आएको छ । तर प्रस्तावित नियममा निश्चित मिति उल्लेख गर्ने र त्यो भन्दा बढी अमेरिकामा बस्न चाहनेहरुले भिसा लम्बाउनका लागि आवेदन दिनुपर्ने प्रावधान रहेको थियो ।
उक्त प्रस्तावित नियममा विद्यार्थी भिसावाहकलाई अधिकतम ४ बर्षसम्ममात्र बस्न पाउनेगरी अध्यागमनमा मिति तोकिने उल्लेख गरिएको थियो भने पत्रकारका सन्दर्भमा आई भिसा वाहकलाई २४० दिन अर्थात् ८ महिनामात्र अमेरिकामा बस्न पाउनेगरी अध्यागमनमा मिति तोकिने उल्लेख थियो । आई भिसामा आउनेहरुले अधिकतम अतिरिक्त २४० दिनसम्म आफ्नो बसाईको अवधि लम्बाउन सक्ने उक्त प्रस्तावित नियममा उल्लेख थियो ।
१० प्रतिशतभन्दा बढी विद्यार्थी भिसा र एक्सचेन्ज भिजिटर भिसामा ओभरस्टे हुने मुलुकका सन्दर्भमा भने २ बर्षसम्ममात्र बस्न पाउने गरी अध्यागमनले अवधि तोक्ने नियममा उल्लेख भएकाले विद्यार्थी र एक्सचेन्ज भिजिटर भिसामा नेपालीहरु ओभरस्टे हुने दर आर्थिक बर्ष २०१९ मा १३ दशमलव ४३ प्रतिशत रहेकोमा यो नियम लागु भएको भए नेपाली विद्यार्थीहरुले २ बर्षको मात्र भिसा पाउने नियम लागु हुने थियो ।
ओभरस्टे भएर पनि अमेरिकाभित्रै रहेका नेपाली विद्यार्थीको प्रतिशत सन् २०१९ मा ११ दशमलव ४३ प्रतिशत रहेको थियो ।
त्यस्तै पढाई समाप्त गरेर फर्कने विद्यार्थीहरुका लागि ६० दिनको अवधि दिइदै आएकोमा प्रस्तावित नियममा त्यसलाई घटाएर ३० दिनमात्र बनाइएको थियो । साथै भिसाको अवधि थप्न चाहने एफ, जे र आई भिसा वाहकले पनि नियमित बायोमेट्रिक दिनुपर्ने प्रस्तावित नियममा उल्लेख थियो ।
एफ, जे र आई भिसामा अहिलेको प्रावधान
एफ, जे र आई भिसामा अमेरिका प्रवेश गर्दा छापसँगै डीएस स्टाटस प्रदान गरिन्छ, जसको अर्थ अमेरिकामा उक्त स्टाटसमा रहँदासम्म वैध हुने भन्ने हुन्छ । अहिलेसम्म उनीहरुलाई भिजिटर भिसामा जस्तो तोकिएको मितिअगाडि फर्कनुपर्ने बाध्यता छैन ।
अमेरिकामा आई भिसामा प्रवेश गर्ने पत्रकारहरुले मिडियामा आवद्ध रहुन्जेल र एफ भिसामा प्रवेश गर्ने विद्यार्थीहरुले पढाईमा आबद्ध हुन्जेल अमेरिकामा कानुनी रुपमा नै बस्न पाउने प्रावधान रहेको छ ।