गर्भवती, सुत्केरी र स्तनपान गराउने कागजपत्रविहिन महिलालाई अमेरिकामा आइसले पक्राउ नगर्ने
प्रकाशित मिति : असार २५, २०७८ शुक्रबार
अब अमेरिका इमिग्रेशन एण्ड कस्टम इन्फोर्समेन्ट आइसले गर्भवती, सुत्केरी र स्तनपान गराउने महिलालाई सामान्यतया पक्राउ नगर्ने र हिराशतमा नराख्ने भएको छ । बाइडेन प्रशासनले अध्यागमन अधिकारीहरुलाई निर्देशन दिदै गर्भवती आप्रवासीहरुलाई पक्राउ गर्ने कामलाई प्राथमिकता नदिन भनेको हो ।
कानूनी रुपमा पक्राउ गर्नैपर्ने र अपवादका मामलाहरुमा बाहेक अब गर्भवती र स्तपान गराउने आप्रवासीहरुलाई पक्राउ नगरिने जनाइएको छ । शुक्रबार संसदीय कर्मचारीहरुलाई पठाइएको मेमोमा यो नीतिबारे उल्लेख गरिएको छ । पक्राउ गर्नैपर्ने अवस्थामा उनीहरुको उचित हेरचाहको बन्दोबस्त गर्न निर्देशन दिइएको छ ।
मेमोमा लैंगीक तटस्थताको भाषा प्रयोग गरिएको छ । जसका कारण तेश्रो लिंगीहरु प्नि समेटिएको जनाइएको छ । सुत्केरी भएको एकबर्ष ननाघेकाहरुले यस्तो छुट पाउने भएका छन् । पहिले नै हिराशतमा रहेकाहरुकोबारेमा पनि हिराशतमा निरन्तर राख्ने वा नराख्नेबारे मूल्यांकन गरिने जनाइएको छ ।
बाइडेन प्रशासनको नीतिले सन् २०१७ को ट्रम्प प्रशासनको मेमोलाई उल्टाएको छ । ट्रम्प कालिन नीतिका कारण अहिले पनि हिराशतमा लिइएका महिलाहरु गर्भवती भए नभएको परीक्षण गर्नुपर्ने आवश्यकता रहेको छ । ट्रम्पकालमा सन् २०१८ मा २०९८ जना गर्भवती महिलाहरुलाई हिराशतमा लिइएको थियो भने ३८१ जना स्तनपान गराइरहेका महिलाहरुलाई हिराशतमा लिइएको थियो ।