डिभी, विद्यार्थी भिसा र परिवारमा आधारित भिसाबारे अमेरिकी दूतावास काठमाडौंका रेडिमेड जवाफ
प्रकाशित मिति : असार १५, २०७८ मंगलबार
अमेरिकी दूतावास काठमाडौंले भिसाबारेका प्रश्नहरुलाई सम्बोधन गर्न सामाजिक सञ्जालमा भिसा च्याट गरेको छ । जसमा दूतावासका कन्सुलर अधिकृतले अमेरिकी भिसाबारेका विभिन्न प्रश्नका जवाफहरु दिएका छन् । तर अधिकांश जवाफहरु रेडिमेड खालका छन् ।
भिसा च्याटमा फेसबुक प्रयोगकर्ताहरुले डाइभर्सिटी भिसा, विद्यार्थी भिसा, ग्रिनकार्डवाहकका दम्पत्ति र छोराछोरीका लागि प्रदान गरिने आप्रवासी भिसा लगायतका परिवारमा आधारित भिसाहरुकाबारेमा धेरैजसो प्रश्नहरु सोधेका छन् । तर दूतावासले दिएको जवाफमा प्रश्नकर्ताको प्रश्नको उचित सम्बोधन गरेको देखिन्न ।
ग्रिनकार्डवाहकका दम्पत्ति र २१ बर्ष ननाघेका छोराछोरीहरुलाई प्रदान गरिने एफटुए भिसाका सन्दर्भमा दूतावासका कन्सुलर अधिकृतले भनेका छन् – ‘हामी पक्कै पनि तपाईको अवस्थाप्रति सहानुभूति राख्छौं । राम्रो खबर यो छ कि हामीले विस्तारै खोल्दैछौं र आप्रवासी भिसाहरु प्रकृयामा लगिरहेका छौं । हामीलाई ब्याकलगका कारण काम गर्न केही समय लाग्नसक्छ । तर निश्चित हुनुहोस् कि हामीले प्रत्येक आवेदकलाई यथासम्भव प्रकृयामा लैजानेछौं । हामीले संचालन अवरोधहरुका कारण सिमित भिसाहरु प्रकृयामा लगिरहेका छौं ।’
त्यस्तै सिमित संख्यामा विद्यार्थी भिसा प्रकृयामा लैजान सुरु गरेको समेत कन्सुलर अधिकृतले जानकारी दिएका छन् । उनले भनेका छन् – ‘हामीले सिमित विद्यार्थी भिसा सेवा प्रदान गर्न सुरु गरेका छौं । माग अत्यन्तै धेरै रहेको छ । हामीले उपलब्ध भए अनुशार अप्वाइन्टमेन्टहरु खोलिरहेका छौं । कृपया अप्वाइन्ट तय गर्नका लागि हाम्रो अप्वाइन्ट तय गर्ने वेवसाइट हेर्दै गर्नुहोला । हामीले विद्यार्थी भिसामा शीघ्र प्रकृयाका अनुरोधहरु समायोजन गरेका छैनौं ।’
भिसा च्याटका क्रममा कैयन प्रश्नकर्ताहरुले आफूहरुको परिवारमा आधारित एफटुए भिसा प्रकृयामा नलगिंदा लामोसमयदेखि दम्पत्तिहरु भेट्न नपाएको र परिवारसँग अलग्गिएर बस्नुपरेको गुनासो समेत गरेका छन् । उनीहरु आफुहरु यथाशीघ्र परिवारसँग भेट्न चाहेकाले परिवारमा आधारित एफटुए लगायतका भिसाहरु प्रकृयामा लैजान अनुरोध गरेका छन् ।
त्यस्तै डिभी विजेताहरुले पनि अहिलेसम्म भिसा अप्वाइन्टमेन्टहरु पाउन नसकेकोमा निराशा व्यक्त गरेका छन् । डिभी २०२१ का विजेताहरुले भिसा पाउनुपर्ने अवधि अब झण्डै ३ महिनामात्र रहेकाले उनीहरु निराश र हतास देखिएका छन् । दूतावासहरुले डाइभर्सिटी भिसालाई कम प्राथमिकतामा राखेकाले पनि उनीहरु थप चिन्तित भएका हुन् । भिसा च्याटमा उनीहरुको चिन्ता पोखिएको छ ।
डिभी विजेताको प्रश्नमा कन्सुलर अधिकृतले भनेका छन् – ‘डिभी २०२१ का लागि छनौट भएकाहरुको अन्तरवार्ता सेप्टेम्बर ३० मा सकिने आर्थिक बर्ष २०२१ भित्रमात्र हुने देखिन्छ । ती आवेदकहरु आगामी बर्षहरुमा डिभी भर्न योग्य हुने देशका नागरिक भएको खण्डमा उनीहरुले डिभी लोटरी भर्न सक्नेछन् । छनौट प्रकृया र्याण्डम हुनेछ भने विगतमा छनौट भएको आधारमा भविश्यमा डिभी भर्न कुनै असर गर्दैन ।’
त्यस्तै अर्का प्रश्नकर्ताको डिभीबारेको प्रश्नमा कन्सुलर अधिकृतले भनेका छन् – ‘हामी तपाईको अवस्थाप्रति सहानुभूति राख्छौं । अमेरिकी विदेश मन्त्रालयले कोरोना महामारी, अवरोध र ब्याकलगकका बाबजुत डिभी भिसा आवेदनहरु परिवारमा आधारित भिसाहरु लगायत भिसा प्राथमिकता अनुरुप प्रकृयामा लैजान हरसम्भव प्रयासहरु गरिरहेको छ । यद्यपी कोरोनाको महामारीका कारण आर्थिक बर्ष २०२१ का तय गरिए अनुरुपका डाइभर्सिटी भिसा जारी नहुने देखिन्छ । विश्वब्यापी अवस्थामा परिवर्तन हुँदै गर्दा विदेश मन्त्रालयले भिसा आवेदनहरु प्रभावकारीरुपमा प्रकृयामा लैजान उपायहरु खोजिरहेको छ ।’
प्रश्नकर्ताहरुले डिभी २०२० का विजेताहरुका लागि संरक्षण गरिएको भनिएका ९०९५ भिसाबारे पनि प्रश्नहरु सोधेका छन् । तर कन्सुलर अधिकृतले अन्य प्रश्नमा दिएको जवाफ जस्तै रेडिमेड जवाफ नै पोष्ट गरेका छन् ।
सम्पूर्ण भिसा च्याट हेर्नका लागि अमेरिकी दूतावास काठमार्डाैको फेसबुक पेजमा जानुहोला ।