अमेरिकी नागरिकता, ग्रिनकार्ड, एसाइलम लगायतमा अबरोधबारे युएससीआईएसलाई साढे ७ हजार सुझाव
प्रकाशित मिति : असार १०, २०७८ बिहीबार
अमेरिकी नागरिकता, ग्रिनकार्ड, एसाइलम लगायतका सन्दर्भका अबरोधबारे अमेरिकी सरकारलाई साढे ७ हजार सुझाव प्राप्त भएका छन् । अमेरिकी सरकारको डिपार्टमेन्ट अफ होमल्याण्ड सेक्युरिटीले गत अप्रिल १९ मा सार्वजनिक सुझावको अपेक्षा गर्दै फेडरल रजिष्टरमा सुचना प्रकाशित गरेको थियो ।
डिपार्टमेन्ट अफ होमल्याण्ड सेक्युरिटीले ग्रिनकार्ड, नागरिकता, एचवानबी भिसा, शरणार्थी, एसाइलम, परोल लगायतका सन्दर्भमा युएससीआईएसका सुविधा र सेवाबारे रहेका अवरोधहरुबारे सार्वजनिक रुपमा सुझावहरु आव्हान गरेका थिए । सर्वसाधारणबाट एकदमै धेरै सुझावहरु आएको र कमेन्ट अवधिभर ७ हजार ४ सय सुझावहरु प्राप्त भएको युएससीआईएसले जनाएको छ ।
प्राप्त कैयन कमेन्टहरु बाइडेन प्रशासन अन्तरगत युएससीआईएसले पहिले नै चालेका कदमहरुलाई अझ सुदृढ पार्न महत्वपूर्ण हुने युएससीआईएसले जनाएको छ । अनलाइन आवेदनमा पहुच बृद्धि, शुल्क पुनरावलोकन, कोरोना महामारी सम्बन्धित प्रकृयागत ढिलाई लगायतका विषयलाई सम्बोधन गर्न युएससीआईएसले कदम चालेको र कमेन्टहरु थप उपयोगी हुने युएससीआईएसले जनाएको छ ।
सार्वजनिक सुझावको आव्हान अमेरिकी राष्ट्रपति जो बाइडेनको कार्यकारी आदेश अन्तरगत गरिएको थियो । अमेरिकाको कानूनी अध्यागमन प्रणालीमा विश्वास पुन कायम गर्न र नयाँ अमेरिकनहरुका लागि समावेशीकरण र एकीकरण प्रयासलाई शशक्त पार्नभन्दै बाइडेनले कार्यकारी आदेश जारी गरेका थिए ।
प्राप्त सुझावहरु सकृयतापूर्वक पुनरावलोकन गर्ने युएससीआईएसले जनाएको छ । भविश्यमा हुने नीति परिवर्तन र कामकारवाही संचालनका लागि ती सुझावहरु प्रयोग गरिने युएससीआईएसले जनाएको छ ।