ट्रम्प प्रशासनका बेला मुद्दा बन्द गरिएका कैयन एसाइलम आवेदकलाई अमेरिका आउन दिइने
प्रकाशित मिति : असार ९, २०७८ बुधबार
ट्रम्प प्रशासनका बेला मुद्दा बन्द गरिएका कैयन एसाइलम आवेदकलाई बाइडेन प्रशासनले अमेरिका आउन दिने भएको छ । ट्रम्प प्रशासनको बेलाको रिमेन इन मेक्सिको कार्यक्रम अन्तरगत अदालती सुनुवाईमा उपस्थीत नभएका कारण देशनिकालाको आदेश दिइएका एसाइलम आवेदकलाई अमेरिकामा आएर अमेरिकाभित्रै प्रकृया सुरु गर्न अनुमति दिइने भएको छ ।
बाइडेन प्रशासनले यो नयाँ नीतिबारे संसदलाई जानकारी दिइसकेको छ । यो श्रेणीमा पर्ने एसाइलम आवेदकहरुलाई बुधबारदेखि अमेरिका आउन अनुमति दिइने जनाइएको छ । ट्रम्पको मेक्सिको फिर्ता गर्ने नीति अनुरुप झण्डै ७० हजार गैर मेक्सिकन आप्रवासीहरुले मेक्सिकोमा प्रतिक्षा गर्नुपरेको थियो ।
बाइडेन प्रशासनले अदालती प्रकृयासम्मका लागि मेक्सिकोमा कुरिरहेका ११ हजारभन्दा धेरै एसाइलम आवेदकलाई अमेरिकाभित्र आएर प्रकृया अगाडि बढाउनका लागि अनुमति दिइसकेको छ । यस दौरान अमेरिकामा परिवार रहेका र ती परिवारका सदस्यहरुलाई भेट्न आएका कैयनको पुनर्मिलन भइसकेको छ ।
अधिकारकर्मीहरुले पूर्व राष्ट्रपति ट्रम्पको नीति अन्तरगत देशनिकालामा परेकाहरुका लागि प्रकृया विस्तार गर्न आग्रह गर्दै आएका थिए । उत्तरी मेक्सिकोमा रहेको अपराधको उच्च दर लगायतका कारण प्रतिक्षा गर्नसक्ने अवस्था नरहेका कारण कैयन आवेदकहरु अदालती सुनुवाईका क्रममा उपस्थीत हुन सकेका थिएनन् । कतिपय एसाइलम आवेदकहरु त अदालती सुनुवाईको मिति अगाडि नै अपहरणमा परेका थिए ।
ट्रम्पको उक्त नीति अन्तरगत झण्डै २७ हजार आप्रवासीहरुले अदालती सुनुवाईमा उपस्थीत नभएका कारण देशनिकालाको आदेश पाएका थिए । झण्डै ६ हजार ६ सय आप्रवासीको मुद्दा बन्द गरिएको थियो । बाइडेनको नीति अनुशार कति आप्रवासीहरु मुद्दा अगाडि बढाउन अमेरिका आउनेछन् भन्ने स्पष्ट छैन । कैयनले पहिले नै मेक्सिको छाडिसकेका छन् ।
अमेरिका प्रवेशका लागि योग्य भएकाहरुले राष्ट्रसंघको शरणार्थी कार्यक्रम अन्तरगत अनलाइनमा दर्ता गराएपछि अप्वाइन्टमेन्ट प्राप्त गर्नेछन् । त्यसपछि उनीहरुलाई तोकिएको पोर्ट अफ इन्ट्रीबाट अमेरिका प्रवेशको अनुमति दिइनेछ । अमेरिकाले एसाइलम खोज्नेलाई अमेरिका प्रवेश अगाडि कोरोना परीक्षण समेत गराउदै आएको छ ।