अमेरिकामा भ्याक्सिन नलगाएकाहरु आक्रमक र खतरनाक कोरोना भेरियन्टको जोखिममा
प्रकाशित मिति : असार ७, २०७८ सोमबार
अमेरिकामा भ्याक्सिन नलगाएकाहरु विगतको भन्दा आक्रमक र खतरनाक कोरोनाको प्रकारको जोखिममा रहेका छन् । अमेरिकामा ४५ प्रतिशतभन्दा धेरैले कोरोनाबिरुद्धको भ्याक्सिन पूर्णरुपमा लगाएपनि कतिपय राज्यहरुमा भ्याक्सिन लगाउने दर निकै कम रहेको छ ।
वासिंटन डिसी र १६ वटा राज्यहरुमा कोरोनाबिरुद्धको भ्याक्सिन पूर्णरुपमा लगाएको जनसंख्या ५० प्रतिशतभन्दा धेरै रहेको छ । तर अलाबामा, अर्कान्सास, लुजियाना, मिसिसिपी, टेनेसी, वायोमिंग लगायतका राज्यहरुमा पूर्णरुपमा भ्याक्सिन लगाउनेहरु ३५ प्रतिशतभन्दा कम रहेका छन् ।
भ्याक्सिन दर कम रहेका राज्यहरुमा संक्रमणदर उच्च रहेको छ । संक्रमण दर उच्च हुनुमा बढी संक्रामक र खतरनाक मानिएको डेल्टा भेरियन्ट रहेको छ । यो भेरियन्ट बढी संक्रामकमात्र नभई कोरोनाबिरुद्धको भ्याक्सिन नलगाएकाहरुलाई बढी सिकिस्त बनाउने खालको रहेको छ ।
बैज्ञानिकहरुले अप्रिलदेखि संकलन गरिएका २० हजार कोरोना संक्रमणका मामलाहरुको बिश्लेषण गर्दा कोरोना संक्रमणदर बढ्नुमा संक्रामक डेल्टा भेरियन्टकै प्रभाव बढी देखिएको छ । त्यस्तै कममात्रामा भ्याक्सिन लगाइएका क्षेत्रमा यो भेरियन्ट उच्चदरमा बढेको पाइएको छ ।
अमेरिकामा अहिलेसम्म ३१७ मिलियन डोज भ्याक्सिन लगाइसकिएको छ । त्यस्तै झण्डै १५० मिलियन जनसंख्याले पूर्णरुपमा भ्याक्सिन प्राप्त गरिसकेको छ । १२ बर्षदेखि १८ बर्षसम्मका झण्डै ८ मिलियनले कोरानाबिरुद्धको भ्याक्सिन लगाइसकेका छन् ।
कोरोनाबिरुद्धको भ्याक्सिनका दुई डोज डेल्टा भेरियन्टबिरुद्धको पनि उच्च प्रभावकारी देखिएको छ । अध्ययन अनुशार फाइजरको दुईडोज भ्याक्सिन कोरोनाको डेल्टा भेरियन्टबिरुद्ध अस्पताल भर्ना हुने अवस्था आउन नदिन ९६ प्रतिशत प्रभावकारी देखिएको छ ।