एसाइलम खोज्नेको स्क्रीनिङका लागि ६ गैर नाफामुलक संस्थासँग बाइडेन प्रशासनको सहकार्य
प्रकाशित मिति : जेष्ठ २४, २०७८ सोमबार
सिमाक्षेत्रमा आएर एसाइलम खोज्नेहरुको स्क्रीनिङका लागि बाइडेन प्रशासनले गैर नाफामुलक संस्थासँग सहकार्य गरेको छ । हरेक दिन दक्षिणी सिमाक्षेत्रबाट अमेरिका आउने २५० जना कुन कुन व्यक्ति छनौट गर्ने भन्ने सन्दर्भमा बाइडेन प्रशासनले गैर नाफामुलक संस्थासँग सहकार्य गरिरहेको छ ।
सम्भावित एसाइलम आवेदकको स्क्रीनिङका लागि ६ वटा संस्थासँग सहकार्य भइरहेको छ । अमेरिकामा एसाइलमको प्रतिक्षामा बसिरहेका दक्षिणी सिमाक्षेत्रका आप्रवासीहरुलाई कसकसलाई अमेरिका प्रवेश गर्न दिने भन्ने प्रारम्भिक छनौट गैर नाफामुलक संस्थाहरुले गरेपछि उनीहरुलाई अमेरिकन अध्यागमन अधिकारीहरुले प्रकृयामा लैजाने गरेका छन् ।
इन्टरनेशनल रेस्क्यु कमिटी, सेभ द चिल्ड्रेन, एचआईएएस, किड्स इन निड अफ डिफेन्स, एसाइलम एक्सेस र इन्स्टीच्युट फर वुमन इन माइग्रेशनसँग बाइडेन प्रशासनले सहकार्य गरिरहेको छ । उनीहरुले आगामी जुलाई ३१ सम्म सम्भावित एसाइलम आवेदकबारे पुनरावलोकन गर्नेछन् । डिपार्टमेन्ट अफ होमल्याण्ड सेक्युरिटी यस्तो सहमति भएको स्वीकार गरेको छ ।
बाइडेन प्रशासनले मंगलबार औपचारिक रुपमा सिमाक्षेत्रमा एसाइलम खोज्नेलाई अदालती प्रकृयासम्म मेक्सिकोमा प्रतिक्षा गर्न पठाउने ट्रम्प प्रशासनको कार्यक्रमलाई खारेज गरिदिएको छ । यो कार्यक्रम अन्तरगत ट्रम्प प्रशासनको पालामा झण्डै २५ हजारलाई मेक्सिको पठाइएको थियो ।
बाइडेन प्रशासनले गत फरबरीमा तीनवटा पोर्ट अफ इन्ट्रीबाट हरेक दिन बढीमा ३ सय जनासम्मलाई प्रकृयामा लैजानका लागि छुट्टै कार्यक्रम घोषणा गरेको थियो ।