पारिवारिक ग्रिनकार्डको देशीय कोटा दोब्बर बनाउने र रोजगारमा आधारितको कोटा हटाउने बिल संसदमा
प्रकाशित मिति : जेष्ठ २१, २०७८ शुक्रबार
अमेरिकामा पारिवारिक ग्रिनकार्डको देशीय कोटा ७ प्रतिशतबाट बढाएर १५ प्रतिशतसम्म बनाउने बिल संसदमा पेश गरिएको छ । इगल एक्ट २०२१ नामको उक्त बिल प्रतिनिधिसभामा डेमोक्रेटिक सदस्य जो लोफग्रेन र रिपब्लिकन सदस्य जोन कुर्तिसले ल्याएका हुन् ।
त्यो बिलमा रोजगारमा आधारित ग्रिनकार्डको देशीय कोटा हटाउने प्रस्ताव गरिएको छ । ईबी टु र ईबी थ्री श्रेणीको ग्रिनकार्डका लागि ९ बर्षको संक्रमण अवधि प्रदान गर्ने तथा संक्रमण अवधिका लागि ५ दशमलव ७५ प्रतिशत भिसा कन्सुलर प्रकृयाका लागि रिजर्भ राख्ने बिलमा उल्लेख छ ।
नर्स र फिजिकल थेरापिस्टहरुका लागि सुरुको ७ बर्ष ४४ सय ईबी थ्री भिसा रिजर्भ राख्ने समेत बिलमा प्रस्ताव गरिएको छ । यो बिल पारित भएमा कामदार भिसा एचवान बीका लागि समेत नयाँ प्रावधानहरुको व्यवस्था गर्नेछ । आई १४० आवेदन स्वीकृत भइसकेको २ बर्ष भइसकेका रोजगारमा आधारित ग्रिनकार्डका आवेदकलाई भिसा उपलब्ध हुनु अगाडि पनि ग्रिनकार्डका लागि आवेदनदिनसक्ने व्यवस्था समेत बिलमा छ ।
यो बिल सन् २०२० को डिसेम्बरमा सिनेटबाट पारित एउटा बिलकै संसोधित रुप हो । तर यो बिलमा एचवान बी र एच फोर भिसा आवेदकले ग्रिनकार्ड फाइल गर्दा सिमाबन्दी तोक्ने प्रावधान भने राखिएको छैन । साथै केही चाइनिज नागरिकहरुलाई ग्रिनकार्ड आवेदन दिनका लागि रोक लगाउने प्रावधान पनि यसमा समावेश छैन ।
अमेरिकामा हरेक बर्ष विश्वभरबाट २ लाख २६ हजारसम्मलाई परिवारमा आधारित ग्रिनकार्ड प्रदान गरिन्छ । त्यस्तै रोजगारमा आधारित ग्रिनकार्ड बार्षिक १ लाख ४० हजारसम्मलाई प्रदान गरिन्छ । तर एउटा देशले कुल संख्याको ७ प्रतिशतभन्दा धेरै ग्रिनकार्ड प्राप्त गर्न नसक्ने नियम रहेको छ ।