यी हुन् नेपालमा हडताल गर्न नपाइने २५ वटा वस्तु तथा क्षेत्र
प्रकाशित मिति : जेष्ठ १९, २०७८ बुधबार
सरकारले विभिन्न २५ वटा वस्तु तथा क्षेत्रलाई बन्द, हड्ताल गर्न नपाइने अत्यावश्यक क्षेत्रका रुपमा राखेको छ। गृह मन्त्रालयले सोमबार राजपत्रमा सूचना प्रकाशन गर्दै उक्त क्षेत्रको नाम सार्वजनिक गरेको हो।
ती २५ वटा सेवालाई सरकारले अत्यावश्यक सेवा सञ्चार ऐन, २०१४ को दफा ३ को उपदफा (१) को अधिकार प्रयोग गर्दै हड्ताल गर्न निषेध गरेको छ। हडताल भएको अवस्थामा कारबाही हुनेछ।
सो सूचीमा टेलिफोन तथा सञ्चार सेवालाई अत्यावश्यक सेवाको रुपमा राखिएको छ। यसबाहेक डाँक, तार तथा टेलिफोन सेवा, जल, स्थल तथा हवाईमार्गबाट यात्री वा मालसामान ओसारपसार गर्ने यातायात सेवा, हवाईअड्डा तथा हवाईजहाजको देखभाल, त्यसको सञ्चालन वा मर्मत गर्ने कामसँग सम्बन्धित सेवा, हवाई ग्राउण्ड, रेल्वे स्टेशन वा सरकारी गोदाममा मालसामान ओसार पसार गर्ने वा राख्ने, झिक्ने वा थन्क्याउने कार्य रहेका छन्।
यस्तै, प्रिन्ट वा सरकारी छापाखाना, हातहतियार खरखजाना वा अरु कुनै सैनिक सर–सामानको उत्पादन गर्ने, थन्क्याउने, वितरण गर्ने कामसँग सम्बन्धित सेवा, सञ्चार सेवा, आन्तरिक सुरक्षा कार्य, खानेपानीको सञ्चालन तथा वितरण, पर्यटन आवास, मोटेल, होटल, रेष्टुराँ र रिसोर्ट, पेट्रोलियम पदार्थको पैठारी, ढुवानी, भण्डारण र वितरणसम्बन्धी छन्।
यस्तै, अस्पताल तथा स्वास्थ्य केन्द्र सञ्चालन, औषधि निर्माण तथा बिक्री वितरण, फोहोरमैला संकलन, ढुवानी, प्रशोधन, विसर्जन, स्थान निर्माण, पूर्वाधार निर्माण र संकलन स्थल एवं व्यवस्थापन क्षेत्रसँग सम्बन्धित सेवा, बैंकिङ सेवा, बिमा सेवा, विद्युत सेवा, दैनिक उपभोग्य वस्तुहरु (खाद्यान्न, दाल, चामल, नुन, तेल) को पैठारी, ढुवानी, भण्डारण तथा वितरणसम्बन्धी सेवा, मौसम पूर्वानुमान, बाढी पूर्वानुमान तथा पूर्वसूचना सेवा, भेटिरिनरी सेवा, कन्सुलर सेवा विभागबाट प्रदान हुने सेवा, राहदानी विभाग र इन्टरनेट सेवा लगायतका सेवाहरु रहेका छन्।
आवश्यक सेवामा हड्_ताल गर्न निषेध गरी जारी आदेश
पाँचतारे होटल क्वारेन्टिनमा सूचीकरण
भारतलगायत तीन गन्तव्यको उडानबाट नेपाल आउने यात्रुका लागि ७८ वटा होटललाई क्वारेन्टिन होटल बनाइएको छ । पर्यटन विभागमा दर्ता भएका ७८ वटा होटललाई क्वारेन्टिन होटलको रुपमा सूचीकरण गरिएको हो।
पर्यटन विभागले बुधबार पर्यटकदेखि पाँचतारे स्तरसम्मका ७८ वटा होटलको नाम क्वारेन्टिन होटलको रुपमा सार्वजनिक गरेको हो।
हीबारदेखि भारतलगायत कतार, टर्की र चीन गरी चार गन्तव्यका लागि उडान खुला गरिएको छ। उक्त चार गन्तव्यबाट स्वदेश आउने यात्रुका लागि उक्त होटललाई क्वारेन्टिन बनाइएको हो।
कोरोना महामारी नियन्त्रणका लागि सरकारले भारतलगायत अन्य देशबाट आउने यात्रुलाई अनिवार्य रुपमा १० दिन क्वारेन्टिनमा बस्नुपर्ने व्यवस्था गरेको छ। यस्तै, खाडी मुलुकबाट आउनेले पाँच दिन बसे पुग्छ भन विशेष परिस्थिति भएकालाई होम क्वारेन्टिनमा पठाउने व्यवस्था पनि रहेको छ ।
विभागले सार्वजनिक गरेको ७८ वटा होटलमध्येमा पाँचतारे स्तरका ७ वटा होटल रहेका छन् । विभागको सूचना अनुसार काठमाडौंमा सञ्चालित सांग्रिला, होटल र्याडिसन, होटल याक एण्ड यति, ह्यात रिजेन्सी सोल्टी, अलफ्ट होटल र एभरेष्ट होटललाई क्वारेन्टिन तोकिएको हो।
पाँचतारे होटलका सञ्चालकले २५ भन्दा बढी कोठा क्वारेन्टिनका लागि छुट्टाएका छन्।
यस्तै, चारतारे स्तरका होटल शंकर र होटल हिमालय, तीनतारे स्तरका समिट होटल, अमादब्लम होटल, साम्बाला होटल, ले हिमालय, होटल प्लाटिनम, होटल ट्रेडिसनल कम्फर्ट र होटल ल्याण्डमार्क गरी ७ होटल क्वारेन्टिनका रुपमा सूचीकरण भएका छन् । यसबाहेक पर्यटनस्तरका ५१ होटल र दुई रिसोर्ट पनि क्वारेन्टिन सूचीमा समावेश छन्।
यसअघि नै एयर बबल अवधारणा अनुरुप नेपाल भित्रनेहरुका लागि संस्कृति, पर्यटन तथा नागरिक उडड्यन मन्त्रालयले ८ वटा होटललाई क्वारेन्टिन होटलका रुपमा छुट्टाएको थियो। उक्त होटलमा ७० हाटल थप गरी ७८ वटा होटललाई क्वारेन्टिन बनाईएको हो।
विभागले पर्यटकस्तरका होटलको दैनिक शुल्क रु तीन हजार (बिहानको खाजा, खाना, दिउँसोको खाजा र साँझको खाना_ तोकेपनि तारे होटलको शुल्क तोकिएको छैन। तारे होटललाई क्वारेन्टिन होटल बनाइएको भन्दै शुल्क निर्धारण नगरिएको विभागका महानिर्देशक रुद्रसिंह तामाङले जानकारी दिए। उनका अनुसार तारे होटलका सञ्चालकले क्वारेन्टिन शुल्क आफैँ निर्धारण गर्नुपर्नेछ।