पूर्णरुपमा भ्याक्सिन लगाएकाहरुले युएससीआईएस कार्यालय जाँदा मास्क लगाउनु नपर्ने
प्रकाशित मिति : जेष्ठ १३, २०७८ बिहीबार
पूर्णरुपमा भ्याक्सिन लगाएकाहरुले अमेरिकामा युएससीआईएसका कार्यालयमा विभिन्न अप्वाइन्टमेन्टहरुमा जाँदा मास्क लगाउनु नपर्ने भएको छ । युएसीआईएसले मास्कबारेको नीतिमा अपडेट गर्दै आफ्ना कार्यालयहरुमा आउँदा पूर्णरुपमा भ्याक्सिन लगाएकाहरुले मास्क लगाउनु नपर्ने जनाएको छ ।
पूर्णरुपमा भ्याक्सिन नलगाएका २ बर्षभन्दा माथिका अन्य सबैले युएससीआईएसका कार्यालयहरुमा जाँदा मास्क लगाउनुपर्नेछ । पूर्णरुपमा भ्याक्सिन लगाएको भन्नाले मोडेर्ना र फाइजरको दोश्रो डोज लगाएको दुईसाता पुगिसकेको बुझिन्छ । त्यस्तै जोन्सन एण्ड जोन्सनको पनि एउटा डोज लगाएको दुईसाता पुगेको हुनुपर्छ ।
विगत १० दिनमा अन्तर्राष्ट्रिय यात्राबाट आएका कोरोनाको लक्षण नभएका पूर्णरुपमा भ्याक्सिन लगाएकाहरुपनि युएससीआईएसका कार्यालयहरुमा जान सक्नेछन् । त्यस्तै विगत १४ दिनको अवधिमा कोरोना संक्रमितको ६ फिटभन्दा नजिक १५ मिनेटभन्दा लामो समय गएकाहरु प्नि पूर्णरुपमा भ्याक्सिन लगाएको भएमा युएससीआईएसका कार्यालयहरुमा जान सक्नेछन् ।
एन ९५ मास्क र उपयुक्त पीपीईसहित कोरोना संक्रमितको नजिकमा गएका स्वास्थ्यकर्मीहरुलाई नजिकको सम्पर्कमा गएको सन्दर्भमा छुट दिइने जनाइएको छ । उपयुक्त स्वास्थ्य मापदण्ड अपनाएर कोरोना संक्रमितको नजिकमा गएका उनीहरुपनि युएससीआईएसका कार्यालयहरुमा प्रवेश गर्नसक्ने जनाइएको छ ।
पूर्णरुपमा भ्याक्सिन नलगाएकाहरु युएससीआईएसको कार्यालयमा जाँदा उपयुक्त मास्क लगाउन सुझाव दिइएको छ । गलबन्दी, पछ्यौरा वा भल्भहरु भएका मास्क लगाएर भने युएससीआईएसका कार्यालयहरुमा जान नपाइने जनाइएको छ । कार्यालयमा फोटो खिच्ने बेलामा वा परिचय सुनिश्चित गर्ने बेलामा भने एकैछिन मास्क हटाउन लगाउन सकिनेछ ।
युएससीआर्ईएसका कार्यालयहरुमा सामाजिक दुरीको नियम भने सबैका लागि लागु हुनेछ । प्रतिक्षाकक्षमा आवेदकले वकिल, अनुवादक, बालबालिकाहरुको हकमा कानूनी अभिभावक, बुबाआमा वा विश्वसनीय बयस्कहरु, आवेदनमा डिपेण्डेटका रुपमा सुचिकृत परिवारका सदस्यहरु र अपांगता भएकाहरुलाई सहयोग गर्ने व्यक्ति बाहेक अरुलाई लैजान पाइनेछैन । नागरिकता वितरण समारोहमा पनि अतिथिहरु लैजान पाइनेछैन ।
विभिन्न ५ श्रेणीमा पर्नेहरुलाई भने अझै पनि कार्यालयमा जान रोक
बिरामी अनुभव गरेकाहरुलाई युएससीआईएसका कार्यालयमा नआउन र अप्वाइन्टहरुको अर्को मिति तय गर्न सुझाव दिइएको छ । कोरोनाको कुनै लक्षण देखिएका कारण अप्वाइन्टहरुको अर्को मिति तय गर्दा कुनै जरिवाना गरिदैन ।
भ्याक्सिन नलगाएका तर विगत १४ दिनको अवधिमा १५ मिनेटभन्दा बढी ६ फिटभन्दा कम दुरीमा कोरोना संक्रमितको सम्पर्कमा आएकाहरुलाई पनि अप्वाइन्टमेन्ट पुन तय गर्न सुझाव दिइएको छ ।
त्यस्तै भ्याक्सिन नलगाएका तर विगत १० दिनमा आन्तरिक उडान, अन्तर्राष्ट्रिय उडान वा पानी जहाजबाट यात्रा गरेर आएकाहरुलाई पनि अर्को अप्वाइन्टमेन्ट तय गर्न सुझाव दिइएको छ ।
कुनै स्वास्थ्य संस्था, अधिकारी वा सरकारी निकायले १४ दिनसम्म सेल्फ क्वारेन्टीन वा सेल्फ आइसोलेसनमा बस्न निर्देशन दिएको भएमा पनि उक्त अवधिमा युएससीआईएसको कार्यालयमा नआउन सुझाव दिइएको छ ।
पूर्णरुपमा भ्याक्सिन नलगाएकाहरुले मास्क लगाउन अस्वीकार गरेमा भवनहरुभित्र छिर्न नदिइने युएससीआईएसले स्पष्ट पारेको छ ।