संसदको रक्षाका लागि थप सक्रिय हुन कानुनविद्को सुझाव, जस्तोसुकै कदम चाल्न तयार छु : सभामुख
प्रकाशित मिति : जेष्ठ १३, २०७८ बिहीबार
सभामुख अग्निप्रसाद सापकोटाले संसदको रक्षाका लागि जस्तोसुकै कदम चाल्न पनि आफू तयार रहेको बताएका छन्। प्रतिनिधिसभा विघटनविरुद्ध परेका मुद्धाको सुनुवाइ सर्वोच्चमा सुरु भएकै दिन बिहीबार संसद भवनमा आयोजित कानुनविद्सँगको परामर्शमा बोल्दै सापकोटाले उक्त कुरा बताएका हुन्। त्यसअवसरमा अधिकांश कानुनविद्ले सभामुख अझ सक्रिय रुपमा संसदको प्रतिरक्षामा उत्रनुपर्ने बताएका थिए।
‘संविधान र संसद्को रक्षाका लागि जस्तोसुकै जोखिम उठाउन र कदम चाल्न म तयार छु,’ सापकोटाले भने, ‘त्यसका लागि अब राजनीतिक दलमार्फत् नागरिकतहसम्म पुग्नेछु।’
राजनीतिक दलसँगको छलफलपछि सभामुखको भूमिकामा उठाउन मिल्ने र उठाउन सकिने कदम चाल्ने उनले बताए। तर संसदमाथिको हमला कुनै पनि हालतमा नस्वीकार्ने उनले चेतावनी दिए।
छलफलमा बोल्दै वरिष्ठ अधिवक्ता रमण श्रेष्ठले प्रतिनिधिसभा जीवितै रहेको अनुभूति दिलाउन सभामुखले अझै बढी सक्रियता बढाउनुपर्ने सुझाव दिए। ‘सभामुखले केही पनि गर्न नसक्ने होइन, संसद जीवित छ भन्ने अनुभूति सभामुखले दिइराख्नुपर्छ, अब पत्रकार, नागरिक समाज, संसदीय समितिहरुसग पनि छलफल गर्नुपर्छ,’ उनले भने।
संसद जीवितै छ भन्ने सर्वोच्चलाई लागेमा प्रतिनिधिसभा पुनःस्थापना गर्ने पनि उनले बताए।
‘२१ घण्टाको समय दिएर नयाँ सरका गठनको आह्वान हुँदा किन केही हुँदैछ भन्ने सोचिएन, विशेष अधिवेशन वा महाअभियोग अगाडि बढाइएको भए यस्तो हुने थिएन। प्रधानमन्त्री र राष्ट्रपतिबीचको जालझेल र तिकडम रोक्न संसद्ले सकेन’ उनले भने।
नेपाल बार एशोसियनका पूर्वअध्यक्ष प्रेमबहादुर खड्काको भनाइ थियो–प्रधानमन्त्रीलाई दुरुत्साहनमा मुद्दा चलाउनुपर्छ।’ कोरोना महामारीका बीच र खोपसमेत लगाउन नपाएको अवस्थाका बीच चुनावमा जाऊ भन्नु मर्न जा भन्नु हो भन्दै उनले यस्तो व्यक्तिलाई दुरुत्साहनमा मुद्दा चलाउनुपर्ने बताए।
वरिष्ठ अधिवक्ता राधेश्याम अधिकारीले सांसद आफैले बाहेक अरु कसैले संसद मार्न नसक्ने बताए। ‘संसद मर्छ भने सांसदकै कारण मात्र मर्छ।सांसदले सरकार दिन सकेनन् बनाउन सकेनन् भने मर्छ। तर सांसदले हामी सरकार दिन्छौं भनेसम्म संसद मर्न सक्दैन,’अधिकारीले भने।
वरिष्ठ अधिवक्ता शम्भु थापाले पनि राष्ट्रपति र प्रधानमन्त्रीले संसद मार्न नसक्ने बताए।
‘यो संविधान संविधानसभाले बनाएको हो । अर्को संविधान बन्ने प्रक्रिया छैन । संविधानसभाको संविधान कहिले पनि मर्दैन । यसलाई मार्न कसैले पनि सक्दैन । यसको संशोधन हुन सक्छ,’ उनले भने।