फुकेर ६० सेकेण्डमा कोरोना संक्रमण थाहा पाउने उपकरणलाई सिंगापुरमा अनुमति
फुकेर ६० सेकेण्डमा कोरोना संक्रमण थाहा पाउने उपकरणलाई सिंगापुरमा अस्थायी अनुमति प्रदान गरिएको छ । यो मेसिनमा ब्रेथलाइजरमा जस्तै फुकेर कोभिड संक्रमण भए नभएको एक मिनेटमा नै थाहा हुने जनाइएको छ ।
नेशनल युनिभर्सिटी अफ सिंगापुर अन्तरगतको कम्पनी ब्रेथोनिक्सले मलेसियासँगको सिमाक्षेत्रको प्रवेश नाकामा यो प्रविधिको प्रयोगात्मक परीक्षण गरिने जनाइएको छ । अहिलेको कोभिड १९ एन्टीजेन तीब्र परीक्षणका साथमा यो प्रविधिको पनि प्रयोग गरिने भएको छ ।
यो परीक्षण सिंगापुर डलर ५ देखि २० भित्र बेचिने भएको छ । सिंगापुरमा गरिएको मुख्य क्लीनिकल परीक्षणमा यो प्रविधिबाट कोरोना परीक्षण गर्दा ९० प्रतिशत सही पाइएको थियो । सिंगापुरमा यस्तो खालको परीक्षण प्रविधिलाई अनुमति दिइएको यो पहिलोपटक हो ।
यो प्रणाली अन्तरगत एकपटकमात्र प्रयोग गरेर नष्ट गरिने टुक्रा मुखमा लगाएर फुक्न लगाइन्छ । प्रयोगकर्ताहरुबीच संक्रमण हुन नदिने सुनिश्चित हुने गरी यसको विकाश गरिएको छ । यदि फुक्दा कोरोना संक्रमण देखिएको खण्डमा त्यस्ता व्यक्तिलाई पीसीआर परीक्षण गर्न लगाइनेछ ।
सिंगापुरमा केही समय अगाडि कोरोना संक्रमण दर शुन्यमा झरेको थियो । त्यसपछि पछिल्लो समयमा भारतमा पहिलोपटक देखिएको कोरोनाको प्रकार समेत देखिन थालेपछि चिन्ता बढेको छ । सोमबार सिंगापुरमा स्थानीय रुपमा फैलिएका कोरोनाका २४ केसहरु भेटिएका थिए ।
