नेपालमा कूल संक्रमितको संख्या ५ लाख नाघ्यो, थप ८९८० मा संक्रमण पुष्टि
प्रकाशित मिति : जेष्ठ ८, २०७८ शनिबार
नेपालमा थप आठ हजार ९८० जनामा कोभिड-१९ संक्रमण पुष्टि भएको छ। स्वास्थ्य तथा जनसङ्ख्या मन्त्रालयका अनुसार पछिल्लो २४ घण्टामा १९ हजार ३५७ को पिसिआर तथा ७४८ को एन्टिजेन परीक्षण गरिएकामा उक्त संख्यामा संक्रमण पुष्टि भएको हो। योसँगै देशभर संक्रमितको कूल संख्या पाँच लाख पाँच हजार ६४३ पुगेको छ। हालसम्म २८ लाख ९७ हजार ५०३ को पिसिआर परीक्षण भएको मन्त्रालयले जनाएको छ।
पछिल्लो २४ घण्टामा आठ हजार ८४८ उपचारपछि निको भएर घर फर्किएका छन्। हालसम्म कोरोना जितेर घर फर्किनेको संख्या तीन लाख ८३ हजार ६८४ पुगेको छ। कारोना निको हुने दर ७५ दशमलव ८ प्रतिशत रहेको छ। यस्तै गत २४ घण्टामा थप १२९जनाको मृत्यु भएसँगै कुल मृतकको संख्या ६ हजार १५३ पुगेको छ। शनिबारसम्म मुलुकभर सक्रिय संक्रमितको संख्या एक लाख नौ हजार ७४० रहेको छ।
मन्त्रालयले उपलब्ध गराएको विवरणमा हालसम्म २१ लाख १३ हजार ८० ले कोरोनाविरुद्धको पहिलो डोज खोप लगाएका छन्। दोस्रो डोज लगाउनेको संख्या पाँच लाख १४ हजार २५३ पुगेको छ।