मौन अवधिमा मत मागेको भन्दै कांग्रेस र माओवादीद्वारा ओलीलाई कारबाहीको माग
प्रकाशित मिति : जेष्ठ ५, २०७८ बुधबार
राष्ट्रिय सभा उपनिर्वाचनको मौन अवधिमा पनि प्रधानमन्त्री केपी शर्मा ओलीले मत मागेको भन्दै प्रमुख दलहरु नेपाली कांग्रेस र माओवादी केन्द्रले आपत्ति जनाएका छन्।
संसद भवन नयाँ बानेश्वरमा बुधबार बसेको कांग्रेस संसदीय दल कार्यसमितिको बैठकले निर्वाचन आचार संहिता उल्लंघन गर्दै प्रधानमन्त्री ओलीले मौन अवधिमा मत माग्दै वक्तव्य दिएकोप्रति भर्त्सना गर्ने निर्णय गरेको हो।
प्रमुख सचेतक बालकृष्ण खाँडले निर्वाचन आयोगले निर्वाचन आचार संहिता उल्लंघन गर्ने जो सुकैलाई पनि कारबाही गर्नुपर्छ भन्ने बैठकले ठहर गरेको उल्लेख गरे। बामगती प्रदेशमा राष्ट्रियसभाको उपनिर्वाचन बिहीबार हुँदैछ।
यस्तै, ओलीले निर्वाचन आचारसंहिता उल्लंघन गरेको भन्दै कारबाही गर्न माओवादी केन्द्रका अध्यक्ष पुष्पकमल दाहाल ‘प्रचण्ड’ ले माग गरेका छन्।
प्रचण्ड सचिवालयतर्फबाट स्वकीय सचिव जोखबहादुर महराले बुधबार प्रेस विज्ञप्ति जारी गर्दै बिहीबार हुन लागेको राष्ट्रिय सभाको उपनिर्वाचनका बेला ओलीले निर्वाचन आचारसंहिता उल्लंघन गरेको भन्दै कारबाहीको माग गरेका हुन्।
बागमती प्रदेश सभाको उपनिर्वाचन बिहीबार हुँदैछ। ओलीले बुधबार एमालेका उम्मेदवार रामबहादुर थापालाई जिताउन मतदातासँग अपील गरेका थिए।