चालु आर्थिक बर्षमा ६२ हजार ५ सयसम्म शरणार्थी स्वीकार गर्ने बाइडेनको घोषणा
प्रकाशित मिति : बैशाख २१, २०७८ मंगलबार
अमेरिकी राष्ट्रपति जो बाइडेनले चालु आर्थिक बर्षका लागि अमेरिकाले स्वीकार गर्ने शरणार्थीको संख्या ६२ हजार ५ सय तय गरेका छन् । यसअगाडि चालु आर्थिक बर्षका लागि पूर्व राष्ट्रपति डोनाल्ड ट्रम्पले तय गरेकै १५ हजारमा शरणार्थी सिमित गर्ने घोषणा गरेपछि आलोचना खेपेका बाइडेनले संख्या बढाएर ६२ हजार ५ सय कायम गरेका हुन् ।
बाइडेनले आगामी आर्थिक बर्षका लागि भने १ लाख २५ हजारसम्म शरणार्थीहरु स्वीकार गर्ने घोषणा गरेका छन् । चालु आर्थिक बर्षमा अहिलेसम्म अमेरिकाले झण्डै २ हजार शरणार्थीहरुलाई मात्र स्वीकार गरेको छ । यो अवस्थामा आगामी सेप्टेम्बर ३० भित्र अमेरिकामा ६२ हजार ५ सय शरणार्थीहरु आउने सम्भावना भने निकै कम रहेको छ ।
यसका लागि बाइडेनले ट्रम्प प्रशासनलाई दोष दिएका छन् । ट्रम्प प्रशासनले बजेट र कर्मचारी कटौती गरेकाले अबको ५ महिनामा अमेरिकामा आउने शरणार्थीको संख्या ६२ हजार ५ सय पुग्ने सम्भावना नरहेको बाइडेनले स्वीकार गरेका छन् । विगत ४ बर्षमा भएको क्षतिलाई पहिलेको अवस्थामा लैजान आफूहरुले काम गरिरहेको र केहीसमय लागेपनि काम सुरु भइसकेको बाइडेनको भनाई छ ।
सोमबारको बाइडेनको घोषणाले विगतमा ट्रम्पले तोकेको १५ हजारको सिमाबन्दीलाई खारेज गरिदिएको छ । पूर्व प्रशासनले तय गरेको ऐतिहासिक रुपमा कम नम्बर १५ हजारले शरणार्थीहरुलाई स्वागत र सहयोग गर्ने मुलुकका रुपमा अमेरिकाको मूल्य मान्यतालाई प्रतिबिम्बित नगर्ने बाइडेनले बताएका छन् ।
चुनावी अभियानका बेलामा बाइडेनले कार्यभार सम्हालेको पहिलो पूर्ण आर्थिक बर्षमा १ लाख २५ हजारसम्म शरणार्थीहरु स्वीकार गर्ने प्रतिबद्धता जनाएका थिए । बाइडेनले कार्यभार सम्हालेपछिको पहिलो पूर्ण आर्थिक बर्ष आगामी अक्टोबर १ बाट सुरु हुनेछ ।