क्यालिफोर्नियाको सान डिएगोमा मानवतस्करीमा संलग्न डुंगा टुक्राटुक्रा हुँदा ४ को मृत्यु, २५ घाइते
प्रकाशित मिति : बैशाख २०, २०७८ सोमबार
क्यालिफोर्नियाको सान डिएगोमा कागजपत्रविहिनहरुलाई ओसार्न प्रयोग भएको मानवतस्करीमा संलग्न डुंगा टुक्राटुक्रा हुँदा कम्तीमा ४ जनाको मृत्यु भएको छ भने अरु २५ जना घाइते भएका छन् । डाउनटाउन सान डिएगोबाट पश्चिममा रहेको पोइन्ट लोमा नजिक ४० फुटको क्याबिन क्रुजर डुंगा दुर्घटना भएको हो ।
डुंगा चालकलाई हिराशतमा लिइएको छ । डुंगामा रहेका कसैको पनि पहिचान नखुलेको जनाइएको छ । डुंगा कुनठाउँबाट आएको हो भन्नेबारे स्पष्ट छैन भने डुंगामा चढेकाहरु कुन देशका हुन् भन्नेपनि खुलेको छैन । डुंगा दुर्घटनापछि केहीले लाइफ ज्याकेट लगाएको र हात हल्लाउँदै गुहार मागेको देखिएको थियो ।
लाइफ गार्डहरुले ७ जनालाई पानीबाट बाहिर निकालेका थिए भने एकजनालाई चेपबाट उद्धार गरेका थिए । उनीहरुमध्ये ४ जनालाई मृत घोषणा गरिएको थियो । केहीलाई हाइपोथर्मिया भएको थियो भने केही डुंगाको टुक्राबाट समेत घाइते भएका थिए ।
केही व्यक्ति भने सामान्य घाइते भएको र हिडेरै एम्बुलेन्ससम्म पुगेको जनाइएको छ । उद्दारका लागि कम्तीमा ९२ जना कर्मचारीहरु परिचालन गरिएको थियो ।