दुईदलका सिनेटरबाट एसाइलम छिटो टुंगो लगाउने लगायतको अध्यागमन बिल सार्वजनिक
प्रकाशित मिति : बैशाख ९, २०७८ बिहीबार
सिमाक्षेत्रका राज्यको प्रतिनिधित्व गर्ने रिपब्लिकन र डेमोक्रेटिक सिनेटरले दक्षिणी सिमाबाट भइरहेको उच्च आप्रवासनलाई सम्बोधन गर्ने अध्यागमन बिल सार्वजनिक गरेका छन् । टेक्सासका रिपब्लिकन सिनेटर जोन कार्नन र एरिजोनाका डेमोक्रेटिक सिनेटर क्रिस्टेन सिनेमाले उक्त बिल सार्वजनिक गरेका हुन् ।
यो बिलले आप्रवासीहरुको उच्च संख्याको व्यवस्थापन गर्ने बन्दोबस्त गर्नेछ भने एसाइलमका दावीहरुलाई छिटो टुंगो लगाउनेछ । सिमाक्षेत्रबाट प्रवेश गर्ने आप्रवासीहरुलाई मानवीय व्यवहारको सुनिश्चित गर्नुका साथै बिलले बालबालिकाहरुको समेत संरक्षण गर्नेछ । आप्रवासनको उच्च प्रवाहलाई सम्बोधन गर्न ४ वटा क्षेत्रीय प्रोसेसिङ केन्द्रहरुको व्यवस्था गर्ने समेत बिलमा उल्लेख छ ।
यी दुईजना सिनेटरहरुले गत मार्चमा पनि राष्ट्रपति बाइडेनलाई पत्र लेखेर सिमा सुरक्षा र एसाइलमको प्रकृयालाई सम्बोधन गर्न आग्रह गरेका थिए । यी सिनेटरहरु बुधबार र मार्चमा इमिग्रेशनबारेको बिलबारे छलफल गर्न भेटघाट गरेका दुईदलीय समुहका समेत सदस्य हुन् । सिनेटर जोन कार्ननले यो बिल अत्यावश्यक आवश्यकतालाई सम्बोधन गर्ने एउटा सुरुवाती बिन्दु भएको बताएका छन् ।
सिनेटर जोन कार्नन र सिनेटर क्रिस्टेन सिनेमाले आफूहरु छुट्टै वा सिमाको प्याकेजका रुपमा बिल पारित गर्नका लागि आफूहरु मार्गप्रसस्त गर्न तयार रहेको बताएका छन् । बृहत अध्यागमन सुधार बिल पारित गर्न मुस्किल भएकाले अहिले यो बिलबाट पहिलो कदम लिनुपर्ने सिनेटर कार्ननको भनाई छ ।
यसअगाडि हाउसबाट टीपीएस र डाकामा रहेकाहरुलाई ग्रिनकार्डको बाटोमा लैजाने बिल पारित भएको थियो । त्यस्तै अर्को बिल कृषि कामदारका सन्दर्भमा रहेको थियो । तर यी बिलहरु पचास पचासमा विभाजित सिनेटबाट पारित नहुने सम्भावनाबीच अड्केका छन् ।