सीबीपी र आइसले आप्रवासीलाई ‘एलियन’ वा ‘इलिगल एलियन’ भन्न रोक्ने
प्रकाशित मिति : बैशाख ६, २०७८ सोमबार
इमिग्रेशन एण्ड कस्टम इन्फोर्समेन्ट आइस र कस्टम एण्ड बोर्डर प्रोटेक्सन सीबीपीले अब आप्रवासीलाई ‘एलियन’ वा ‘इलिगल एलियन’ भन्न रोक्ने भएको छ । बाइडेन प्रशासनले अमेरिकाको अध्यागमन कार्यान्वयन एजेन्सीहरुलाई आप्रवासीहरुका सन्दर्भमा ‘एलियन’ वा ‘इलिगल एलियन’ लगायतका शब्दहरु प्रयोग नगर्न आदेश दिएको हो । ट्रम्प प्रशासन अन्तरगत यस्ता शब्दहरु व्यापक रुपमा प्रयोग हुँदै आएका थिए ।
सोमबार आइस र सीबीपीका प्रमुखहरुलाई पठाइएको मेमुनोमा यस्तो आदेश दिइएको हो । यी एजेन्सीहरु अमेरिकामा संघीय अध्यागमन कानूनको कार्यान्वयन गर्ने मुख्य निकायहरु हुन् । ट्रम्पकालिन कडा नीतिहरुलाई उल्टाएर अध्यागमन प्रणालीलाई मानवीय बनाउने बाइडेन प्रशासनको प्रयासकै क्रममा यो कदम आएको हो ।
परिवर्तन अनुशार ‘एलियन’को साटो ‘नन सिटिजन’ वा ‘माइग्रेन्ट’ शब्द प्रयोग गरिने भएको छ । ‘इलिगल’ शब्दको साटो ‘अनडकुमेन्टेड’ शब्द प्रयोग गरिने भएको छ । आइसका कार्यकारी निर्देशक टाइ जोन्सनले समावेशी शब्दको प्रयोग गरिने बताएका छन् ।
बाइडेनले आफ्नो कार्यकालको पहिलो दिनमा नै संघीय अध्यागमन कानूनबाट ‘एलियन’ शब्द हटाउने प्रस्तावित बिल संसदमा पठाएका थिए । ‘एलियन’ शब्दलाई ननसिटिजनले विस्थापित गर्दा अमेरिकालाई आप्रवासीको मुलुकका रुपमा चिनाउने ह्वाइट हाउसको भनाई छ ।