युएससीआईएसले ग्रिनकार्ड लगायतका आवेदनबारे निर्णय गर्दा अटोमेटिक प्रारम्भिक प्रकृया अपनाउने
प्रकाशित मिति : बैशाख ३, २०७८ शुक्रबार
अब युएससीआईएसले ग्रिनकार्ड लगायतका आवेदनको प्रारम्भिक प्रकृया अटोमेटिक बनाउने र त्यसले आवेदनको प्रारम्भिक प्रकृया छरितो बनाउन सहयोग गर्ने युएससीआईएसका प्रमुख प्रविधि अधिकारी रोब ब्राउनले बताएका छन् । युएससीआईएसमा आवेदनको चर्को ब्याकलग रहेको बेलामा पहिलो चरणमा अटोमेटिक तरिकाले आवेदन अगाडि बढाउने तयारी गरिएको हो ।
प्राकृतिक भाषा प्रकृया नामको यो प्रविधि अपनाउँदा अधिकारीलाई आवेदनबारे निर्णय गर्न सहज हुनेछ भने कुनै आवेदनमा सम्भावित जालसाजी भएको खण्डमा कम्प्युटर प्रणालीले पहिचान गर्नेछ । प्रविधिले आवेदकको भौगोलिक र बायोमेट्रिक तथ्यांकलाई समायोजन गरेर ग्रिनकार्ड लगायतका आवेदनका सन्दर्भमा कागजातहरुलाई अलग अलग गराउनेछ ।
यसरी प्रणालीले कागजातहरु अलग अलग गराएपछि अधिकारीले जुन कागजात वा प्रमाण हेर्न चाहेको हो त्यही कागजातको मूल्यांकन गर्न सक्नेछन् । सबै कागजातहरु एकएक गरेर हेर्नुपर्ने अवस्थाको अन्त्य हुनेछ । कुनै एउटा कागजात खोज्दा सबै कागजातहरुको ठेली पल्टाएर हेर्नुपर्ने अवस्थाको अन्त्य हुने र अधिकारीहरुलाई निर्णय गर्न सहज तथा छरितो हुने विश्वास गरिएको छ ।
कागजातहरु सक्कली भए नभएको जाँच्न पनि कम्प्युटर प्रणालीको प्रयोग गरिनेछ । त्यसो हुँदा अधिकारीले आफूले चाहेको कागजातमा क्लीक गरेर उक्त कागजातको थप परीक्षण गर्न सक्नेछन् । युएससीआईएसलाई आधुनिकीकरण गर्दै जाने क्रममा २०२५ भन्दा अगाडि थुप्रै परिवर्तनहरुको तयारी भइरहेको ब्राउनले बताएका छन् ।