सिमा कडाई गर्न मेक्सिको, होण्डुरस र ग्वाटेमालासँग बाइडेन प्रशासनको सहमति
प्रकाशित मिति : चैत्र ३१, २०७७ मंगलबार
बाइडेन प्रशासनले मेक्सिको, होण्डुरस र ग्वाटेमालासँग उनीहरुको सिमाक्षेत्रमा कडाई गर्न र आप्रवासनलाई व्यवस्थीत गर्न सहमति कायम गरेको छ । मेक्सिको, होण्डुरस र ग्वाटेमालाले अमेरिकासँगको सहमतिमा उनीहरुको सिमा सुरक्षाका लागि थप सुरक्षाकर्मी परिचालन गर्न सहमत भएका छन् ।
उनीहरुले मानव तस्करी र लागुऔषधको तस्करी नियन्त्रणका लागिमात्र नभई तस्करहरुले बालबालिकाहरुको दुरुपयोग गरेकाले बालबालिकाहरुको संरक्षणका लागि समेत यो कदम चालेको राष्ट्रपति बाइडेनको अध्यागमन नीतिका विशेष सहयोगी टेलर मोरनले जनाएका छन् । मेक्सिको सिमाक्षेत्रबाट अमेरिका आउने आप्रवासीहरुको प्रवाह नियन्त्रणका लागि बाइडेन प्रशासनले संघर्ष गरिरहेको बेलामा यो सहमति भएको हो ।
सिमाक्षेत्रबाट कागजपत्रविहिन बालबालिकाहरु विना अभिभावक अमेरिका प्रवेश गर्ने क्रम तीब्र बन्दा बाइडेन प्रशासनलाई मुस्किल परिरहेको छ । उनीहरुलाई सुरक्षित तरिकाले अमेरिकामा प्रकृयामा लैजानका लागि चुनौतिपूर्ण अवस्था श्रृजना भएको हो ।
बाइडेन प्रशासनले आप्रवासनको कारण खोजेर त्यसको समाधानको प्रयास गरिरहेको जनाएको छ । सिमानाको समस्यामात्र समाधान गरेर नभई आप्रवासीहरु सिमानामा आउनुको कारण सम्बोधन गर्नुपर्ने मोरनको भनाई छ । राष्ट्रपति बाइडेनले उपराष्ट्रपति कमला ह्यारिसको नेतृत्वमा सिमाक्षेत्रको आप्रवासन लगायतका विषय सम्बोधन गर्न जिम्मा दिएका छन् ।
सीबीपीले मार्चमा मात्र अमेरिका र मेक्सिको सिमाक्षेत्रमा सिमापार गर्न खोज्ने १ लाख ७२ हजार भन्दा धेरै कागजपत्रविहिनलाई नियन्त्रणमा लिएको थियो । जुन अघिल्लो महिनाको तुलनामा ७२ प्रतिशतले बढी हो । मार्चमा सीबीपीले अभिभावकविनाका १८ हजार ८ सय ९० कागजपत्रविहिन बालबालिकाहरुलाई सिमापार गर्न खोज्दा नियन्त्रणमा लिएको थियो जुन अघिल्लो महिनाको तुलनामा झण्डै दोब्बर हो ।