अमेरिकी नागरिकता पाउनेलाई स्वागत गर्न बाइडेनले बनाए भिडियो, सपथग्रहणमा बजाइने
प्रकाशित मिति : चैत्र २३, २०७७ सोमबार
अमेरिकी नागरिकता लिने क्रममा सपथ ग्रहण समारोहमा राष्ट्रपतिले नयाँ अमेरिकनहरुलाई स्वागत गरेको भिडियो बजाउने चलन छ । राष्ट्रपति जो बाइडेनले कार्यभार सम्हालेको साढे २ महिनापछि उक्त भिडियो रेकर्ड गरेका छन् । अब उक्त भिडियो नागरिकता वितरण समारोहमा बजाइनेछ ।
‘अमेरिका तपाईको आकांक्षाका लागि योग्य भएको विश्वास गनुभएकोमा र हामीलाई छनौट गर्नुभएकोमा धन्यवाद ।’- बाइडेनले उक्त भिडियोमा भनेका छन् ।
बाइडेनले भनेका छन् -‘तपाईहरु सबैको एउटै साझा कुरा साहस हो । त्याग गरेर यो यात्रा तय गर्नका लागि साहस चाहिन्छ । आफ्नो घर, जीवन र माया गर्नेहरुलाई छाडेर एउटा त्यस्तो देशमा आउने साहस जुन ठाउँमात्र होइन, बरु एउटा विचार हो । बाइडेनले भनेका छन् ।’
‘आज तपाईले त्यही पद पाउनुभएको छ जुन अमेरिकी राष्ट्रपतिको बराबर छ, अमेरिकाको नागरिक भन्ने यो पदका लागि म गर्व गर्दछु । स्वागत छ मेरा मित्रहरु । मेरा अमेरिकन मित्रहरु । स्वागत छ ।’ – बाइडेनले भिडियोमा भनेका छन् ।
नागरिकता वितरण समारोहहरुमा राष्ट्रपतिले स्वागत गरेको भिडियो बजाउने प्रचलन भएपनि कोरोनाको महामारीका कारण अहिले त्यस्ता भिडियोसहितका समारोहहरु भने खासै हुन पाएका छैनन् । पूर्व राष्ट्रपति ट्रम्पले पनि नयाँ अमेरिकी नागरिकलाई स्वागत गर्ने भिडियो बनाएका थिए ।