गाडिएको अवस्थामा फेला पर्यो ३२ दिनअघि बेपत्ता भएका दम्पतीको शव
प्रकाशित मिति : चैत्र १२, २०७७ बिहीबार
महोत्तरीको पिपरा गाउँपालिका–५ सहोर्वाबाट बेपत्ता पारिएका दम्पतीको शव फेला परेको छ।
६८ वर्षीय मुसाफिर झा र उनकी ५८ वर्षीया श्रीमती गीतादेवी झाको शव पिपरा गाउँपालिका–२ स्थित अतरार जाने बाटोमा प्रहरीले फेला पारेको हो।
घरमा सुतिरहेको अवस्थामा मुसाफिर र गीता फागुन १० गते बेपत्ता भएका थिए।
दुवै जनाको शव गाडिएको अवस्थामा बरामद गरिएको हो। कपडा, चुरा, साडी, पोतेलगायतका सामानका आधारमा छोरा मनिषकुमार झाले शवको खनाखत गरेका हुन्।
प्रहरीले हालै खनिएको माटो देखिएपछि खन्दै जाने क्रममा कंकाल र लत्ताकपडा फेला पारेको थियो। झा दम्पतीलाई खोज्ने क्रममा प्रहरीले धनुषा र महोत्तरीका ४२ वटा पोखरी सर्च गरेको थियो।
झा दम्पतीको अपहरणमा संलग्न रहेको आरोपमा प्रहरीले चार जनालाई पक्राउ गरेको छ। तर, पक्राउ परेका उनीहरूले अपराध स्वीकार गरेका छैनन्।