सरकारले सहमति कार्यान्वयन नगरेकोमा विप्लवको असन्तुष्टि
प्रकाशित मिति : चैत्र ९, २०७७ सोमबार
फाइल तस्बिर
गत फागुन २० गते सरकार र नेत्रविक्रम चन्द ‘विप्लव’ नेतृत्वको नेकपाबीच ३ बुँदे सहमति भएको थियो। जसको एउटा प्रमुख बुँदा थियो–देशका विभिन्न कारागारमा रहेका विप्लव समूहका नेता र कार्यकर्ता रिहा गर्ने र सम्पूर्ण मुद्दा खारेज गर्ने।
तर तीन साता पुग्नै लाग्दा पनि सहमति कार्यान्वयन नभएपछि विप्लवले सोमबार प्रधानमन्त्री केपी ओलीलाई भेटी असन्तुष्टि व्यक्त गरेका छन्।
भेटमा विप्लवले सरकारसँग भएको सहमतिअनुसार आफ्नो पार्टीका नेता-कार्यकर्ता रिहा गर्न ढिला भएको बताएका थिए। उनले आफ्ना कार्यकर्ताको रिहाइ र मुद्दा फिर्ता कहिले हुन्छ भन्दै जिज्ञासा राखेका थिए। यस विषयमा ओलीले सहमति कार्यान्वयन गर्ने आश्वासन दिएको बताइएको छ।
अहिले पनि विप्लव नेतृत्वको नेकपाका सचिवालय सदस्य हेमन्तप्रकाश ओली, माइला लामा, चुडामणि ओली, भरत बम र चन्द्रबहादुर चन्द गरी पाँच केन्द्रीय सदस्य तथा १ सय ४३ नेता+कार्यकर्ता जेलमै रहेको बताइएको छ।