ओली पक्षको केन्द्रीय कमिटी बैठक : ओली थप शक्तिशाली
प्रकाशित मिति : चैत्र ७, २०७७ शनिबार
नेकपा एमालेको केपी शर्मा ओली पक्षले पार्टी अध्यक्षलाई थप शक्तिशाली बनाएको छ। ओलीपक्षको शनिबार बसेको केन्द्रीय कमिटी बैठकले पार्टी केन्द्रीय कमिटी तथा मातहत कमिटीका सदस्यलाई हटाउने, मनोनयन तथा कारबाही गर्ने अधिकार पनि अध्यक्षलाई नै प्रत्यायोजन गरेसँगै ओली थप शक्तिशाली बनेका हुन्।
बैठकले संघीय तथा प्रदेश सभाका समानुपातिक सांसदहरूको बन्दसूचीमा रहेका नाम हटाउने, राख्ने या हेरफेर गर्ने अधिकार पनि ओलीलाई नै दिएको छ।
अदालत, निर्वाचन आयोग र अन्य आधिकारिक निकायमा पार्टीको तर्फबाट गर्ने सबै कामका अख्तियारी पनि पार्टी अध्यक्षलाई दिइएको छ।
५ नेतालाई स्पष्टीकरण सोध्ने निर्णय
बैठकले वरिष्ठ नेता माधवकुमार नेपाल, भीम रावल, सुरेन्द्र पाण्डे, घनश्याम भुसाल र रामकुमारी झाँक्रीलाई स्पष्टीकरण सोध्ने निर्णय पनि गरेको छ। उनीहरुलाई पार्टी हितविरुद्ध काम गरेको र गुटगत भेला गरेको भन्दै स्पष्टीकरण सोध्ने निर्णय गरिएको हो।
महाधिवेशन आयोजक कमिटी गठन
बैठकले १० औं महाधिवेशनका लागि आयोजक कमिटी गठन गरेको छ। २८ फागुनमा बालुवाटारमा बसेको ओलीपक्षको केन्द्रीय कमिटी बैठकले २०७८ मंसिर २ देखि ६ गतेसम्म महाधिवेशन गर्ने निर्णय गरेको थियो।
फागुन २८ गतेको केन्द्रीय कमिटी सदस्य संख्या २ सय ६२ जना पुर्याइएकोमा त्यसैलाई महाधिवेशन आयोजक कमिटी बनाइएको जनाइएको छ।
शनिबारको बैठक माधवकुमार नेपाल र झलनाथ खनाल पक्षले बहिस्कार गरेको थियो।