४० बर्षपछि भारतको जेलमा भेटिएका इलामका दीपकलाई रिहा गर्न अदालतको आदेश, घर फर्कदै
प्रकाशित मिति : चैत्र ५, २०७७ बिहीबार
४० बर्षसम्म विना सुनुवाई जेलमा बसेका नेपाली दीपक जैसी तिम्सिनालाई भारतको कोलकाता उच्च अदालतले रिहा गर्न आदेश दिएको छ । अब उनी केहीदिनमा घर फर्कने तयारी गरेको जनाइएको छ ।
इलामबाट ४० बर्ष अगाडि हराएका उनी हालै भारतको जेलमा भेटिएका थिए । उनी २०३७ सालमा इलामको एक तप्पाबाट हराएका थिए । उनको मुद्दाको पेसी ४० वर्षसम्म अदालतमा चढेको थिएन।
हराउँदा २० वर्षका युवक रहेका दीपक जैसी अहिले ६० बर्ष पुगिसकेका छन् । कर्तव्य ज्यान मुद्दामा पक्राउ परेको चार दशकसम्म पनि सुनुवाइ हुन नसक्दा उनी घर फर्कन पाएका थिएनन् । तर कोलकाताको दमदम कारागारमा रहेका उनलाई बुधबार अदालतले रिहा गर्न आदेश दिएको हो ।
रोजगारीको खोजीमा उनी भारतको दार्जिलिङ गएका र त्यहाँ बस्ने क्रममा प्रहरीले पक्राउ गरेर कर्तव्य ज्यान मुद्दा लागेको थियो ।
२०३७ सालमा उनी तोरीको पोको बेच्न भनेर इलामको मङ्गलबारे हिँडेपछि कहिले पनि घर फर्केर नआएको र परिवारका सदस्यले उनको मृत्यु भइसकेको आशङ्का गरेका थिए ।
अदालतको आदेशपछि उनका आफन्तहरु दीपकलाई घर ल्याउन बिहीवार कोलकातातर्फ लागेको जनाइएको छ । शुक्रबार दीपकका आफन्त र कोलकातास्थित महावाणिज्य दूतावासले संयुक्त रूपमा उनलाई बुझ्ने र घर ल्याउने जनाइएको छ ।
४० बर्षसम्म मुद्दाको फैसला नगरी कारागारमा राखिएको भन्दै भारत सरकारले क्षतिपूर्ति दिनुपर्ने दीपकका परिवारको माग रहेको छ । दीपकको अवस्था ज्यादै दयनीय भएको जनाइएको छ ।