टीपीएस र डाकामा हुनेलाई ग्रिनकार्डहुँदै नागरिकता दिने बिलमा भोलि मतदान
प्रकाशित मिति : चैत्र ४, २०७७ बुधबार
भोलि अमेरिकी संसदको तल्लो सदन प्रतिनिधिसभामा डाका र टीपीएसबाहकलाई नागरिकताको बाटोमा लैजाने दुईवटा महत्वपूर्ण अध्यागमन बिलमा मतदान हुने भएको छ । यी बिलहरु ११ मिलियनलाई कागजपत्र दिने खाकासहित राष्ट्रपति जो बाइडेनले अगाडि सारेको अमेरिकी नागरिकता ऐन २०२१ बिलभन्दा फरक हुन् ।
मंगलबार प्रकृयागत अवरोध पार गरिसकेका यी बिलहरुमा बिहिबार मतदान हुने हाउसमा डेमोक्रेटिक नेता स्टेनी होयरले बताएका छन् । दुबै सदनबाट यो बिल पारित भएमा साढे ४ मिलियनलाई ग्रिनकार्ड हुँदै अमेपरकी नागरिकताको बाटो खुल्नेछ । यद्यपी सिनेटबाट बिल पारित गर्न भने सहज छैन । त्यसैले बिलको सिनेटमा मृत्यु हुने सम्भावना छ ।
बिहिबार मतदान हुने अमेरिकन ड्रिम एण्ड प्रमिस एक्टमा टीपीएस र बाल्यकालमा अमेरिका आएका कागजपत्रविहिनलाई संरक्षण प्रदान गर्ने डाकाले समेटेकाहरुलाई ग्रिनकार्डको बाटोमा लैजाने उल्लेख छ । यो बिल पारित भएमा झण्डै १० हजार नेपाली टीपीएसबाहकहरुलाई फाइदा पुग्नेछ । डाकाले समेटेका नेपालीहरु भने एकसयभन्दा पनि कम छन् ।
त्यस्तै अर्को फार्म वर्कफोर्स मोर्डनाइजेशन एक्टमा कृषि कामदारहरुलाई कानुनी स्टाटसका लागि बाटो बनाउने उल्लेख छ । विगत २ बर्षमा कम्तीमा १८० दिन काम गरेका कृषि कामदारहरुलाई यो सुविधा प्राप्त हुनेछ । यो श्रेणीमा पर्ने नेपालीहरु रहेको कुनै सार्वजनिक रेकर्ड छैन ।