कर्णाली प्रदेश : सरकारलाई दिएको समर्थन फिर्ता लिने ओली पक्षको निर्णय, नेपाल पक्ष भन्छ–समर्थन कायमै छ
प्रकाशित मिति : चैत्र ४, २०७७ बुधबार
एमालेमा केपी ओली पक्ष र माधव नेपाल पक्षबीचको टकरावको असर प्रदेश सरकारमा देखिएको छ। ओली पक्षले समर्थन फिर्ता लिएपछि कर्णाली प्रदेश सरकार संकटमा परेको छ। एमाले संसदीय दलको बुधबार बसेको बैठकले सरकारबाट समर्थन फिर्ता लिने निर्णय गरेसँगै महेन्द्रबहादुर शाही नेतृत्वको सरकार संकटमा परेको हो।
एमाले संसदीय दलको बैठकले सरकारमा सहभागी मन्त्रीहरूलाई पाँच दिनभित्र फिर्ता हुन निर्देशनसमेत दिएको छ।
कर्णाली प्रदेश सरकारमा एमाले तर्फबाट आर्थिक मामिला तथा योजनामन्त्री प्रकाश ज्वाला, सामाजिक विकासमन्त्री दल रावल र उद्योग पर्यटन वन तथा वातावरणमन्त्री नन्दसिंह बुढा छन्।
संसदीय दलको बैठकमा एमालेका २० मध्ये १० सांसद उपस्थित थिए।
४० सदस्यीय कर्णाली प्रदेशसभामा एमालेका २० र माओवादी केन्द्रका १३ जना सांसद छन्।
उता, कर्णाली प्रदेश सरकारमा एमालेका तर्फबाट सहभागी आर्थिक मामिला तथा योजनामन्त्री प्रकाश ज्वालाले सरकारलाई एमाले प्रदेश सभा दलको समर्थन कायमै रहेको बताएका छन्।
उनले बुधबार गरिएको भनिएको संसदीय दलको बैठक गुटको भेलामात्रै भएको उल्लेख गर्दै बैठकका लागि आधिकारिक सूचना नआएको बताए। संसदीय दलको विधानसमेत नबनेको अवस्थामा उक्त निर्णय कानुनसम्मत नभएको उनको भनाइ छ।