झलनाथ खनाल भन्छन्–सरकार जोगाउन लाग्छु, माधव नेपाल समूह पनि पार्टीलाई एकताबद्ध गर्ने पक्षमा
प्रकाशित मिति : फाल्गुन २६, २०७७ बुधबार
पार्टीमै रहेर संघर्ष अघि बढाउने भन्दै पेरिसडाँडाबाट निस्किएका एमाले वरिष्ठ नेताहरु झलनाथ खनाल र माधवकुमार नेपालले अब केपी ओली नेतृत्वको सरकार जोगाउने पक्षमा अभिव्यक्ति दिन थालेका छन्।
बुधबारको प्रतिनिधिसभा बैठकपछि सञ्चारकर्मीसँग कुरा गर्दै वरिष्ठ नेता झलनाथ खनालले प्रधानमन्त्री केपी शर्मा ओली नेतृत्वको सरकार दुई वर्ष चल्नुपर्ने धारणा राखे।
‘हाम्रो एमालेको सरकार छँदैछ, यो सरकार अबको दुई वर्षे कार्यकाल राम्रो ढंगले पूरा गर्नुपर्छ,’ खनालले भने, ‘एमालेको वरिष्ठ नेताको हैसियतले यो सरकार दुई वर्ष जानुपर्छ म चाहन्छु।’
उनले आफूहरू सरकार जोगाउनै पक्षमा लाग्ने बताएका छन्। आफूहरू सरकार जोगाउने पक्षमा रहे पनि संसदको खेलमा के हुने भन्न नसकिने उनले बताए।
‘संसद भनेको सर्वोच्च राजनीतिक मञ्च हो, सम्पूर्ण राजनीतिक पार्टीले खेल खेल्ने ठाउँ हो,’ उनले भने,‘नयाँ खेलको सुरुवात हुन्छ, त्यसको परिदृष्य कस्तो हुन्छ। तपाईंहरूले विस्तारै हेर्दै जानुहुनेछ।’
उता माधवकुमार नेपाल पक्षको बुधबारको भेलाले पनि विगतका कुरा बिर्सदै पार्टीको एकता, भविष्य र जनताको सर्वोपरी हितलाई ध्यानमा राखेर पार्टी अघि बढ्नुपर्ने निष्कर्ष निकालेको छ।
सो पक्षका नेता रघुजी पन्तले प्रधानमन्त्री र पार्टी अध्यक्ष पनि भएकाले अब पार्टीलाई एकताबद्ध गरेर लैजाने कुरामा केपी ओलीकै निर्णायक भूमिका रहने बताए।
उनले तत्काल एकता सम्भव नभए पनि देशभरका वामपन्थीबीच मोर्चा बनाउन पनि पहल गर्नुपर्ने बताए।
उनले धनगढीमा बुधबार केपी ओली पक्ष र माधव नेपालपक्षबीच भएको झडपको घटनालाई दुःखद भएकाले उल्लेख गर्दै भने, ‘पार्टीका सम्पूर्ण कमिटी एकताभन्दा अगाडिको अवस्थामा जहाँ थिए, सोही अवस्था रहन्छ।’