राजदुत खतिवडाको ओहोदाको प्रमाणपत्र बाइडेनबाट स्वीकार, महामारीका कारण पत्रमार्फत पेश


प्रकाशित मिति : फाल्गुन १०, २०७७ सोमबार

अमेरिकाका लागि नेपाली राजदुत डाक्टर युवराज खतिवडाको ओहोदाको प्रमाणपत्र अमेरिकी राष्ट्रपति जो बाइडेनले स्वीकार गरेका छन् । बाइडेनले गत बुधबार खतिवडाको ओहोदाको प्रमाणपत्र स्वीकार गरेको वासिंटन डिसीमा रहेको नेपाली दूतावासबाट आज जारी वक्तब्यमा जनाइएको छ ।

ओहोदाको प्रमाणपत्र अमेरिकी विदेशमन्त्रालयमार्फत ह्वाइटहाउसमा पठाइएको थियो । खतिवडाले नेपालका राष्ट्रपति, प्रधानमन्त्री र नेपाली जनताका तर्फबाट अमेरिकी राष्ट्रपति जो बाइडेनलाई शुभकामनासहित ओहोदाको प्रमाणपत्र पठाएका थिए । बाइडेनका तर्फबाट ओहोदाको प्रमाणपत्र प्राप्त भएको जानकारी दिदै खतिवडालाई स्वागत गरिएको छ ।

सामान्यतया भौतिक रुपमा नै उपस्थीत भएर ओहोदाको प्रमाणपत्र बुझाउने प्रचलन भएपनि कोरोनाको महामारीका कारण ओहोदाको प्रमाणपत्रमात्र पत्रमार्फत  ह्वाइटहाउसमा पठाइएको दूतावासले जनाएको छ । पूर्वराजदूत डाक्टर अर्जुनबहादुर कार्की फर्केको भोलिपल्टै खतिवडा फेब्रअरीको पहिलो साता अमेरिका आएका हुन् ।

राजदुत खतिवडा नेपाली अर्थविद् तथा नेपालका पूर्व अर्थमन्त्री हुन् । उनी नेपाल राष्ट्र बैङ्कको पन्ध्रौँ गभर्नर थिए भने उनले कोलम्बोमा यूएनडीपी रिजनल सेन्टरमा तीन वर्ष अर्थशास्त्रीको रूपमा काम गरेका थिए ।

खतिवडा बिक्रम सम्बत २०५९ देखि २०६२ सम्म नेपाल सरकारको राष्ट्रिय योजना आयोगमा उपाध्यक्ष भएका थिए । उनी ओली मन्त्रिमण्डलका अर्थमन्त्री थिए भने गोकुल बाँस्कोटाले राजिनामा दिएपछि सुचना तथा सञ्चार प्रविधि मन्त्रीको समेत जिम्मा लिएका थिए ।

© 2023 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com