देशनिकालाबारे बाइडेन प्रशासनको नयाँ नीति, नोभेम्बर १ पछि सिमाबाट छिर्नेहरु पनि उच्च प्राथमिकतामा
प्रकाशित मिति : फाल्गुन ९, २०७७ आईतबार
बाइडेन प्रशासनले देशनिकालाको नयाँ प्राथमिकता तय गरेको छ । यसै अनुशार इमिग्रेशन एण्ड कस्टम इन्फोर्समेन्ट आइसलाई नयाँ प्राथमिकताबारे निर्देशन समेत जारी गरिसकेको छ ।
९० दिनका लागि तय गरिएको उक्त निर्देशिका अनुशार निश्चित प्रकारका अपराधमा दोषी ठहरिएकाहरुलाई सार्वजनिक सुरक्षा अन्तरगत देशनिकालाका लागि अनुमति दिइएको छ । ९० दिनभित्र दीर्घकालिन नीति निर्माण गरिने र त्यतीबेलासम्मका लागि यही अस्थायी नीति कार्यान्वयनमा आउने भएको छ ।
आतंकबाद, जासुसी लगायतका कारण राष्ट्रिय सुरक्षामा खतरा रहेकाहरुपनि देशनिकालाको प्राथमिकतामा पर्ने भएका छन् । त्यस्तै सन् २०२० को नोभेम्बर १ पछि गैरकानुनी रुपमा सिमाबाट छिरेकाहरु पनि देशनिकालाको प्राथमिकतामा पर्ने भएका छन् ।
७ पेज लामो उक्त निर्देशिकाको पूर्ण पाठ
आइसका कार्यकारी निर्देशक टाइ जोन्सनले आफ्नो सिमित साधनश्रोत अहिलेका लागि राष्ट्रिय सुरक्षा, सिमा सुरक्षा र सार्जजनिक सुरक्षामा जोखिमपूर्ण व्यक्तिलाईमात्र देशनिकालामा लगाउने बताएका छन् । नयाँ नीति अनुशार आइसका एजेण्टहरुले जो सुकैलाई पनि पक्राउ गरेर देशनिकाला गर्न आवश्यक नभएको र उनीहरुले आफ्नो तजविज अधिकार सुझबुझपूर्ण तरिकाले प्रयोग गर्नसक्ने जनाइएको छ ।
गिरोहका सदस्यहरु, तस्करहरु र आतंकवादीहरुलाई देशनिकालाको उच्च प्राथमिकतामा राखिएको आइसले जनाएको छ । अमेरिकामा बसिरहेका कागजपत्रविहिनहरुले विगतमा कुनै जघन्य अपराध गरेको भएमा उनीहरु सार्वजनिक सुरक्षा अन्तरगत देशनिकालाको प्राथमिकतामा पर्नेछन् ।
कतिपय अधिकारकर्मीहरुले नोभेम्बर १ पछि सिमाक्षेत्रबाट गैरकानुनी रुपमा अमेरिका छिरेकाहरु देशनिकालाको प्राथमिकतामा राखिएकोमा आपत्ति जनाएका छन् । आइसका अधिकारीहरुले तोकिएको मापदण्डहरु ठीक तरिकाले पूरा नगरेकाहरुलाई देशनिकालाको प्राथमिकतामा राख्ने वा नराख्ने भन्ने सन्दर्भमा आफूभन्दा माथिका अधिकारीबाट स्वीकृति लिनुपर्ने भएको छ ।