सिमाक्षेत्रमा एसाइलम दावी गर्दा मेक्सिको फिर्ता पठाइएकाहरुलाई अमेरिका प्रवेश सुरु
प्रकाशित मिति : फाल्गुन ७, २०७७ शुक्रबार
अदालती प्रकृयासम्मका लागि मेक्सिकोमा नै फिर्ता पठाइएका झण्डै २५ हजार आप्रवासीहरुलाई अदालती प्रकृयासम्म पनि अमेरिकाभित्रै आएर प्रतिक्षा गर्नका लागि सरकारले आज २५ जनालाई प्रकृयामा लगेको छ । उनीहरुलाई आज क्यालिफोर्नियाको शान सिद्रो पोर्ट अफ इन्ट्रीमा प्रकृयामा लगिएको हो ।
अमेरिकी सरकार र अन्तर्राष्ट्रिय पार्टनरहरुले अदालती प्रकृयासम्म प्रतिक्षा गर्न मेक्सिकोमा फिर्ता पठाइएकाहरुको भर्चुअल दर्ता सुरु गरेको हो । प्रतिक्षा गरिरहेकाहरुलाई स्वीकृत भएर अप्वाइन्टमेन्टको सुचना नपाएसम्म पोर्ट अफ इन्ट्रीतिर नआउन भनिएको छ ।
सीबीपी वान एप्लीकेशनमार्फत प्रमाणित भएकाहरु र नेगेटिभ कोरोना परीक्षण भएका झण्डै २५ जनालाई अन्तर्राष्ट्रिय संघसंस्थाहरुले आज मेक्सिको अमेरिका सिमाक्षेत्रको शान सिद्रो पोर्ट अफ इन्ट्रीमा पठाएका थिए । उनीहरुलाई सुरक्षित र प्रभावकारी तरिकाले प्रकृयामा लगिएको जनाइएको छ ।
भिडियो हेर्नुहोस्:
सीबीपीले सबै आवेदकको जाँचबुझ गर्नुका साथै आवश्यकता अनुशार विद्युतीय आवेदन फर्म डाउनलोड गर्न सिकाएको थियो । आइस र सीबीपीको प्रकृया पूरा भएपछि सहयोगी संघ संस्थाहरुले उनीहरुका लागि यात्राको प्रबन्ध गरेका थिए ।
अमेरिकी सरकारको विदेश मन्त्रालय र होमल्याण्ड सेक्युरिटीले संघीय, राज्य र स्थानीय स्वास्थ्य मापदण्डहरुको पूर्ण पालनाका लागि मेक्सिकोको सरकार, अन्तर्राष्ट्रिय संघसंस्था र सीडीसीसँग समन्वय गरिरहेको जनाएको छ ।
दर्ता गरेकाहरु र योग्यहरुलाई मिति, समय र उपस्थीत हुने स्थान लगायत पोर्ट अफ इन्ट्रीसहित बाँकी प्रकृयाबारे जानकारी गराइने जनाइएको छ । अन्य पोर्ट अफ इन्ट्रीहरुले अर्कोसातादेखि प्रकृया सुरु गर्ने जनाइएको छ ।
ट्रम्पले ल्याएको माइग्रेन्ट प्रोटेक्सन प्रोटोकल एमपीपी अन्तरगत सिमाक्षेत्रमा आएर एसाइलम गर्नेलाई अदालती प्रकृयासम्म प्रतिक्षा गर्नका लागि मेक्सिकोमा नै पठाइएको थियो । उनीहरुलाई प्रकृयामा लैजानका लागि डिपार्टमेन्ट अफ होमल्याण्ड सेक्युरिटीले फेबु्रअरी १९ बाट पहिलो चरणको कार्यक्रम सुरु गर्ने घोषणा गरेको थियो ।
राष्ट्रपतिले प्रतिज्ञा जनाएअनुशार सरकार सुरक्षित, व्यवस्थीत र मानवीय अध्यागमन प्रणालीको विकाश गर्न कटिबद्ध रहेको र पछिल्लो कदम अध्यागमन प्रणालीमा सुधार अन्तरगतको रहेको डिपार्टमेन्ट अफ होमल्याण्ड सेक्युरिटीका सेक्रेटरी अलेहान्द्रो मेयरकासले जनाएका छन् ।
योग्य व्यक्तिलाई उनीहरुको मुद्दा अमेरिकामा नै सुरक्षित तरिकाले अगाडि बढाउन दिनका लागि अमेरिकी सरकारले अन्तर्राष्ट्रिय सरकारहरु र गैरसरकारी संस्थाहरुसँग सहकार्य गर्ने उनले बताएका छन् । यो नयाँ प्रकृया सिमाक्षेत्रमा आएर एसाइलम दावी गरेका र उनीहरुको मुद्दा अदालतमा रहेको अवस्थामा अदालती सुनुवाईसम्म प्रतिक्षाका लागि मेक्सिको फिर्ता पठाइएकाहरुको सन्दर्भमा मात्र लागु हुनेछ ।
एमपीपी कार्यक्रम अन्तरगत मेक्सिको फिर्ता नपठाइएका, अमेरिकी अध्यागमन अदालतमा मुद्दा नरहेका र अमेरिकाबाहिर रहेकाहरुका सन्दर्भमा यो प्रकृया लागु हुनेछैन । उनीहरुले भने थप जानकारीका लागि प्रतिक्षा गर्नुपर्ने जनाइएको छ । एमपीपी अन्तरगत नयाँ व्यक्तिलाई दर्ता गर्ने काम अमेरिकी सरकारले रोकिसकेको छ । एमपीपी अन्तरगत दर्ता भएका र अमेरिकामा आइसकेकाहरुका सन्दर्भमा पनि आगामी दिनमा फरक निर्देशिका जारी गरिने भएको छ ।
यो घोषणालाई अमेरिकाको सिमाक्षेत्रबाट अनियमित रुपमा व्यक्ति प्रवेशका लागि खुला गरिएको भन्ने गलत ढंगले अर्थ नलगाउन समेत सुझाव दिइएको छ । योग्य व्यक्तिलाई तोकिएको मिति र स्थानबाटमात्र प्रवेशको अनुमति दिइने जनाइएको छ ।