अक्टोबर १ पछिका १२ महिनामा १ लाख २५ हजारलाई शरण दिने बाइडेनको घोषणा
प्रकाशित मिति : माघ २२, २०७७ बिहीबार
अमेरिकी राष्ट्रपति जो बाइडेनले आगामी अक्टोबर १ पछिका १२ महिनामा १ लाख २५ हजार शरणार्थी स्वीकार गर्ने घोषणा गरेका छन् । आगामी सेप्टेम्बरको अन्त्यसम्मका लागि पूर्व राष्ट्रपति डोनाल्ड ट्रम्पले बढीमा १५ हजारमात्र शरणार्थी स्वीकार गर्नेगरी कोटा लगाएकाले आगामी आर्थिक बर्षमात्र बाइडेनले नयाँ कोटा तय गर्नसक्नेछन् ।
बाइडेनले आज शरणार्थी कार्यक्रमलाई पुनस्थापनाका लागि कार्यकारी आदेश स्वीकृत गरेको बताएका छन् । अमेरिकी विदेश मन्त्रालयमा विदेशमन्त्री र विदेशमन्त्रालयका कर्मचारीसँगको भेटघाटपछि विशेष सम्बोधन गर्दै बाइडेनले यस्तो घोषणा गरेका हुन् । शरणार्थी कार्यक्रममा अमेरिकाको नेतृत्व कायम गर्नका लागि बाइडेनले धेरै शरणार्थी भित्राउने योजना बनाएका हुन् ।
डोनाल्ड ट्रम्पले शरणार्थीहरुको बार्षिक कोटा घटाउँदै लगेकोमा जो बाइडेनले चुनावी अभियानताका नै यो संख्या उल्लेख्य बृद्धि गर्ने प्रतिबद्धता जनाउँदै आएका थिए । ट्रम्पले चालु आर्थिक बर्षका लागि शरणार्थीको संख्या कोटा घटाएर १५ हजारमा झारेका छन्, जुन सन् १९८० यताकै सबैभन्दा कम हो ।
डोनाल्ड ट्रम्पले कार्यभार सम्हाल्दा आर्थिक बर्ष सन् २०१७ का लागि पूर्व राष्ट्रपति बराक ओबामाले शरणार्थीको बार्षिक कोटा १ लाख १० हजार कायम गरेका थिए । तर उक्त बर्ष जम्मा ५३ हजार १ सय १६ जना शरणार्थीलाईमात्र स्वीकार गरिएको थियो ।
त्योभन्दा अगाडिको आर्थिक बर्ष २०१६ मा ओबामाले शरणार्थीको बार्षिक कोटा ८५ हजार तोकेका थिए । उक्त बर्ष ८४ हजार ९ सय ९४ शरणार्थी अमेरिका आए, जुन सन् १९९९ पछिकै सबैभन्दा धेरै हो ।
नेपालबाट अमेरिका आउने भुटानी शरणार्थीको संख्या यस्तै कोटामा आधारित थियो । तर यो कोटामा अमेरिकाभित्रै आएर एसाइलम दावी गर्नेहरुको संख्या भने पर्दैन ।