बाइडेनबाट अमेरिकी अध्यागमनमा सुधारका लागि तीन कार्यकारी आदेश जारी
प्रकाशित मिति : माघ २०, २०७७ मंगलबार
अमेरिकी राष्ट्रपति जो बाइडेनले आज तीनवटा कार्यकारी आदेश जारी गरेका छन् । ट्रम्पकालिन कठोर अध्यागमन नीतिलाई उल्टाउने लक्ष्यका साथ बाइडेनले आज अध्यागमनबारे थप तीनवटा कार्यकारी आदेश जारी गरेका छन् । तर आज जारी कार्यकारी आदेशको तत्काल प्रभाव पर्ने नभई ट्रम्पकालिन नीतिको पुनरावलोकनका सन्दर्भमामात्र महत्वपूर्ण मानिएको छ ।
बाइडेनबाट आज जारी एउटा कार्यकारी आदेश मार्फत सिमाक्षेत्रमा बिछोडिएका परिवारको पुनर्मिलनको लागि टास्क फोर्स बनाइएको छ । जसको नेतृत्व डिपार्टमेन्ट अफ होमल्याण्ड सेक्युरिटीका सेक्रेटरी अलेहान्द्रो मेयरकासले गर्नेछन् । सिमाक्षेत्रमा हजारौं परिवारलाई अलग गराउने ट्रम्प प्रशासनको नीतिलाई उल्टाउने प्रतिबद्धता जनाउँदै आएका बाइडेनले निर्माण गरेको टास्क फोर्स उक्त प्रयासको मुख्य भाग रहेको जनाइएको छ ।
टास्क फोर्सले बिछोडिएका बुबाआमा र बालबालिका पत्ता लगाउनका लागि अमेरिकी सरकार, सरोकारवालाहरु, प्रभावित परिवारका प्रतिनिधिहरु लगायतसँग समन्वय गर्नेछ । टास्क फोर्सले नियमित रुपमा राष्ट्रपतिलाई रिपोर्ट उपलब्ध गराउने छ र भविश्यमा यस्तो वियोग आउन नदिन नीति निर्माणका लागि समेत उचित कदम सिफारिस गर्नेछ । बाइडेनले कुनै नयाँ नीतिको घोषणा गरेको नभई खराब नीतिहरु हटाउँदै गरेको बताएका छन् ।
कार्यकारी आदेशमा पहिले नै देशनिकाला भइसकेका बाबुआमाहरुलाई उनीहरुका अमेरिकामा रहेका छोराछोरीसँग मिलनका लागि कुनै विशेष संरक्षणको व्यवस्था भने गरिएको छैन । टास्क फोर्सको केबल परिवारहरु बिछोडिएको अवलोकनमात्र गर्नेछ ।
टास्क फोर्स निर्माणबारे पहिलो कार्यकारी आदेशको पूर्णपाठ
दोश्रो कार्यकारी आदेशले सेन्ट्रल अमेरिकन माइनर कार्यक्रम लगायतका अध्यागमनबारेका कार्यक्रमहरुको पुनरावलोकन गर्नेछ । यो कार्यक्रम ओबामाकालमा सुरु भएको थियो । यो कार्यक्रमले बिछोडिएका बालबालिकाहरुलाई अमेरिकामा रहेका परिवारसँग मिलनका लागि अनुमति दिन्छ । ट्रम्पले यो कार्यक्रम सन् २०१७ मा खारेज गरेका थिए ।
यो कार्यकारी आदेशले सिमाक्षेत्रमा एसाइलम खोज्नेलाई प्रकृया चलुन्जेल मेक्सिको फिर्ता पठाउने नीतिको पुनरावलोकन गर्नेछ । यो कार्यक्रमका कारण सिमाक्षेत्रमा आएर एसाइलम दावी गरेका दशौं हजार व्यक्तिलाई अदालती प्रकृया चलुन्जेलका लागि भन्दै मेक्सिकोमा नै फिर्ता पठाइएको छ ।
तेश्रो कार्यकारी आदेशले विदेश मन्त्रालय, न्याय मन्त्रालय र गृह मन्त्रालयलाई ट्रम्पकालमा लागु गरिएका अध्यागमनबारेका नीति र निर्देशिकाको पुनरावलोकनका लापग निर्देशन दिएको छ । कानूनी अध्यागमन प्रणालीमा अवरोध उत्पन्न गर्ने सबै नीतिको पुनरावलोकनका साथै पब्लिक चार्जको नीतिबारे पनि पुनरावलोकनका लागि निर्देशन दिइएको छ ।
अमेरिकामा आएर स्वास्थ्य, आवास वा खाद्यान्नबारे सरकारी सुविधा लिनेहरुका सन्दर्भमा उनीहरुले सुविधा लिएको रकम उनीहरुलाई स्पोन्सर गर्नेहरुबाट तिराउने ट्रम्पको मेमोलाई बाइडेनले खारेज गरेका छन् । यो मेमो ट्रम्पले सन् २०१९ को मे २३ मा जारी गरेका थिए । बाइडेनले त्यसलाई खारेज गर्दै पुनरावलोकनका लागि एजेन्सीलाई निर्देशन दिएका छन् ।
पब्लिक चार्ज लगायतका नीतिको पुनरावलोनका सन्दर्भमा कार्यकारी आदेशको पूर्णपाठ
बाइडेनले आज जारी कार्यकारी आदेशको मर्म केवल ट्रम्पकालिन नीतिहरुको पुनरावलोकनमात्र रहेको छ । बाइडेनले कार्यकारी आदेशमार्फत कुनै ठोस कदम चालेका छैनन् ।