आज अध्यागमनबारेका यी महत्वपूर्ण कार्यकारी आदेश जारी गर्दै बाइडेन
प्रकाशित मिति : माघ २०, २०७७ मंगलबार
अमेरिकी राष्ट्रपति जो बाइडेनले आज अत्यत्नै महत्वपूर्ण कार्यकारी आदेशहरु जारी गर्ने भएका छन् । सपथग्रहण गरेको पहिलो दिनमा नै ११ मिलियन कागजपत्रविहिनलाई कागजपत्रको बाटोमा लैजाने अमेरिकी नागरिकता ऐन संसदमा पठाएका बाइडेनले आज एसाइलम लगायतका सन्दर्भमा कार्यकारी आदेश जारी गर्ने ह्वाइट हाउसले जनाएको छ ।
सिमाक्षेत्रमा बिछोडिएका परिवारको पुनर्मिलनको लागि आज बाइडेनले टास्क फोस्कको निर्माण गर्नेछन् । सिमाक्षेत्रमा हजारौं परिवारलाई अलग गराउने ट्रम्प प्रशासनको नीतिलाई उल्टाउने प्रतिबद्धता जनाउँदै आएका बाइडेनले निर्माण गर्ने टास्क फोर्स उक्त प्रयासको मुख्य भाग हुनेछ ।
टास्क फोर्सले बिछोडिएका बुबाआमा र बालबालिका पत्ता लगाउनका लागि अमेरिकी सरकार, सरोकारवालाहरु, प्रभावित परिवारका प्रतिनिधिहरु लगायतसँग समन्वय गर्नेछ । टास्क फोर्सले नियमित रुपमा राष्ट्रपतिलाई रिपोर्ट उपलब्ध गराउने छ र भविश्यमा यस्तो वियोग आउन नदिन नीति निर्माणका लागि समेत उचित कदम सिफारिस गर्नेछ । आजको बाइडेनको आदेशले बाबुआमाबाट बालबालिकालाई अलग गराउने नीतिको पक्षमा रहेको ट्रम्पको आदेश उल्टाउनेछ ।
बाइडेनको आज जारी गर्ने कार्यकारी आदेशले मेक्सिकोसँगको अमेरिकी सिमाक्षेत्रबाट अनियमित प्रवेशलाई सम्बोधन गर्दै मानवीय एसाइलम प्रणाली निर्माणका लागि रणनीति तयार गर्नेछ । ट्रम्पको नीतिले सिमाक्षेत्रमा अराजकता, निर्ममता र अन्यौल श्रृजना गरेको अवस्थामा बाइडेनले ट्रम्प प्रशासनले लिएका कैयन नीतिलाई उल्टान सुरुवात गर्नेछन् ।
बाइडेनले सिमाक्षेत्रमा सुरक्षा, कानूनसम्मत र विधिसम्मत योजना घोषणा गर्नेछन् । पहिलो आप्रवासीहरुले घर छाड्नुपर्नाको कारणलाई सम्बोधन गर्ने प्रयास गरिनेछ । दोश्रो, जोखिममा रहेकाहरुलाई अमेरिकामा मात्र नभई उनीहरुको घर नजिक शरण र सुरक्षाको व्यवस्था मिलाउनका लागि विभिन्न विदेशी सरकार, अन्तर्राष्ट्रिय संस्थाहरु लगायतसँग समन्वय गरिनेछ । तेश्रो, अमेरिकामा शरण खोज्नेलाई उचित कानूनी बाटो प्रदान गरिनेछ ।
सिमाक्षेत्रमा एसाइलम खोज्नेलाई प्रकृया चलुन्जेल मेक्सिको फिर्ता पठाउने नीतिको पुनरावलोकनका लागि निर्देशन दिइसकिएको छ । आजको कार्यकारी आदेशले अमेरिकामा एसाइलम प्रणालीलाई पुनजीर्वित गर्न श्रृंखलाबद्ध आदेशहरु दिनेछ ।
त्यस्तै आज बाइडेनले अमेरिकाको अध्यागमन प्रणालीप्रति विश्वास जगाउन विभिन्न आदेशहरु जारी गर्नेछन् । जस अन्तरगत हालै ल्याइएका अध्यागमनबारेका नीतिको सम्पूर्ण पुनरावलोकनका लागि सरकारी निकायलाई आदेश दिइनेछ । कानूनी अध्यागमन प्रणालीमा अवरोध उत्पन्न गर्ने सबै नीतिको पुनरावलोकनका साथै पब्लिक चार्जको नीतिबारे बाइडेनले आज महत्वपूर्ण कदम चाल्नेछन् ।
अमेरिकामा आएर स्वास्थ्य, आवास वा खाद्यान्नबारे सरकारी सुविधा लिनेहरुका सन्दर्भमा उनीहरुले सुविधा लिएको रकम उनीहरुलाई स्पोन्सर गर्नेहरुबाट तिराउने ट्रम्पको मेमोलाई बाइडेनले खारेज गर्नेछन् । ग्रिनकार्ड आवेदनका सन्दर्भमा ल्याइएको पब्लिक चार्जको नीति पुनरावलोकनका लागि सरकारी निकायलाई निर्देशन दिनेछन् । त्यस्तै अमेरिकी नागरिकताको प्रकृयालाई पनि व्यवस्थीत बनाउनेछन् ।
बाइडेनले यी कार्यकारी आदेशहरु शुक्रबार नै जारी गर्ने तय भएपनि आजका लागि पछाडि सारिएको थियो ।