अमेरिकामा ठगहरुको फोनकलको शिकार बन्दै नेपाली, ३० हजार डलर ठगिनेमा न्युयोर्कका नेपाली
प्रकाशित मिति : मंसिर २४, २०७७ बुधबार
केही दिन अगाडि वासिंटन डिसीमा एकजना नेपाली उबर चालकलाई फोन आयो – ‘तिम्रो गाडीमा हामी डंकिन डोनटको स्टीकर लगाइदिन्छौं, उक्त विज्ञापन वापत हामी तिमीलाई हप्ताको ५ सय डलर दिनेछौं । के तिमी त्यसको लागि इच्छुक छौ ?’
गाडीमा एउटा स्टीकर राखेर विज्ञापनवापत साप्ताहिक ५ सय डलर आउने कुराले उनी आकर्षित भए । त्यसपछि उनले त्यसमा स्वीकृति जनाए । फोन गर्नेले भन्यो – ‘हामी २५ सयको चेक पठाउँछौं । त्यो जम्मा गरेपछि हामीलाई स्टीकर बनाउन त्यसबाट २४ सय डलर पठाउनु ।’
केही दिनमा चेक पनि आयो । नेपाली उबर चालकले चेक फोनमार्फत जम्मा गरे । उताबाट फेरी फोन आयो – ‘बैंकमा चेक जम्मा भयो ?’
चेक जम्मा गरेको बताएपछि उनलाई फोन गर्ने व्यक्तिले २४ सय डलर नगद स्टीकर बनाउनका लागि पठाउन भन्यो । ती नेपाली उबर चालकले बैंक खाताबाट २४ सय डलर पठाइदिए । त्यसको भोलिपल्ट चेक बाउन्स भएको सुचना बैंकले दियो । त्यसपछिमात्र उनले चेक नक्कली भएको र आफू ठगिएको थाहा पाए । त्यसपछि आफूलाई विज्ञापनको लोभ देखाउने व्यक्तिलाई उनले फोन गरेर चेक बाउन्स भएको बताए । ती व्यक्तिलाई उनलाई ठगिएको र अब आइन्दा फोन नगर्न भने ।
+++++++++++++++++
नोभेम्बरको अन्तिम साता न्युयोर्क निवासी एकजना नेपालीले ३० हजार डलर गुमाए । उनलाई फेडरल रिजर्भबाट भन्दै फोन गरेर ठगले बैंक खाता ह्याक भएको र तुरुन्तै रकम निकाल्न भने । तत्काल बैंकबाट रकम ननिकालेमा सबै रकम गुम्ने डर देखाएपछि ती नेपालीले बैंकबाट सबै ३० हजार डलर निकाले ।
फोन गर्ने ठगले उनलाई फोन राख्नै दिएन । उक्त रकम नजिकैको बिट क्वाइन एटीएमको ठेगाना दिएर त्यहाँ लगेर हाल्न भन्दै एउटा क्युआर कोड दियो । त्यहाँ रकम हालेपछि नजिकको प्रहरीले उनलाई उक्त रकम दिने समेत ठगले बतायो । ठगले दिएको ठेगानामा रहेको एटीएममा गएर उनले क्वुआर कोड स्क्यान गरे । एटीएम खुलेपछि उनले त्यहाँ सबै ३० हजार डलर हाले । जब उनले त्यहाँ रकम हाले, तब उनी आफू ठगिएको थाहा पाए । उनले आफ्नो पैसा फिर्ता निकै गराउन प्रयास गरेपनि फिर्ता गराउन सकेनन् ।
+++++++++++++++++
गत अक्टोबरमा मेरिल्याण्ड निवासी एकजना रेष्टुरेण्ट संचालकलाई ठगको फोन आयो । ४ हजार डलर विजुलीको बिल तिर्न बाँकी रहेको र लाइन काट्न कर्मचारी खटाइएको बताए । तत्काल मनी अर्डरबाट ४ हजार डलर नतिरे विजुलीको लाइन काट्ने चेतावनी दिएपछि संचालक आत्तिए । विजुलीको लाइन काटेमा रेष्टुरेष्टमा फ्रिजर लगायत नचल्ने भएकाले तत्कालै खानेकुरा खराब हुने स्थीति थियो । त्यस्तै विजुलीको लाइन काटिएमा रेष्टुरेण्टमा नै समस्या हुने ठानेर उनी तत्काल रकम पठाउन मनी अर्डर मनाउन गए ।
ठगहरुले विभिन्न डर देखाएर फोन राख्न दिएका थिएनन् । त्यहीबेला एकजना साथीले हालखबर सोध्न मेसेज गर्दा उनले आफू विजुलीको बिल तिर्नका लागि मनी अर्डर बनाउन लागेको बताए । ठगको यस्तो हर्कतबारे बुझेका उनका साथीले उनलाई तत्काल सचेत गराए र ठगिन लागेको जानकारी दिए । त्यसपछि ती रेष्टुरेण्ट सचालकले फोन काटे र ठगिनबाट बचे ।
+++++++++++++++++
यसरी अमेरिकामा रहेका नेपालीहरु ठगका फोनकलबाट ठगिने क्रम जारी रहेको छ । खसोखासमा आएका नेपालीका केही विवरणमात्र हेर्दा पनि अहिलेसम्म अमेरिकामा नेपालीहरुले लाखौं डलर त्यस्ता ठगहरुलाई बुझाइसकेका छन् । पछिल्ला यी घटनाक्रमले ठगहरुले ठग्नका लागि नयाँ नयाँ जुक्ती लगाउन थालेको स्पष्ट भएको छ । यसअगाडि ठगहरुले आईआरएस, इमिग्रेशन, प्रहरी लगायतका निकायबाट फोन गरेको भन्दै रकम माग्ने गरेकोमा अब भने अरु नयाँ नयाँ जुक्तीहरु समेत लगाउन थालेका छन् ।
अमेरिकामा आईआरएस र युएससीआईएसबाट फोन गरेको भन्दै ठगहरुले सर्वसाधारणलाई धम्क्याएर रकम असुल्ने ठगीधन्दाबारे सरकारले सचेतना जगाउन विभिन्न सुचनाहरु जारी गरेपछि ठगहरुले नयाँ नयाँ उपाय अपनाउन थालेका हुन् । यसअगाडि आईआरएस र युएससीआईएसबाट फोन गरेको भन्दै ठगहरुले अमेरिकामा रहेका कैयन नेपालीहरुलाई ठगिसकेका छन् ।
ठगहरुले फोन गरेर ट्याक्स राम्रोसँग फाइल नगरेको वा अरु विभिन्न कारण देखाउदै तत्काल रकम नतिरे पक्राउ गर्ने वा डिपोर्टेशन गर्नेसम्मका धम्की दिने गर्दैै आएका छन् । त्यस्तै आफू युएससीआईएसबाट बोलेको भन्दै उनीहरुले अध्यागमन सम्बन्धि सुचना नसच्याएको वा अरु विभिन्न कारण देखाउँदै रकम नतिरे पक्राउ गर्ने वा डिपोर्टेशन गर्ने धम्की दिने गरेका छन् ।
केही पहिले आईआरएसबाट फोन गरेको भन्दै रकम माग्ने ठगलाई बोष्टनका एकजना नेपालीले १० हजार अमेरिकी डलर बुझाएका थिए । ठगले उनलाई तुरुन्तै स्टोरमा गएर भौचरमार्फत रकम नतिरे पक्राउ गर्ने र डिपोर्टेशन गर्ने धम्की दिएपछि ति नेपालीले हतासिएर ठगलाई रकम बुझाएका थिए । रकम बुझाइसकेपछि मात्र उनले आफू ठगिएको पत्तो पाए ।
यस्ता ठगहरुले प्राय घरको नम्बरमा फोन गरेर ट्याक्स फाइल नगरेकाले जरिवाना तिर्न धम्क्याउने गरेका छन् । उनीहरुले प्राय फार्मेसीहरुमा गएर ग्रिन डट मनी भौचरबाट रकम तिर्ने उपाय सुझाउने गरेका छन् । तुरुन्तै कसरी रकम तिर्ने भन्ने तरिका पनि उनीहरुले नै सिकाउने गरेका छन् । फोन गर्नेहरु प्राय भारतीय लवजमा बोल्ने गर्छन् ।
यस्ता ठगहरुबाट ठगिनेहरु नेपाली, भारतीय र भर्खर अमेरिकामा आएका अन्य देशका नयाँ आप्रवासीहरु समेत रहेका छन् । त्यसैले यस्ता फोनकलहरु आएमा कुरा नगर्न र आधिकारिक सरकारी निकायहरुमा खबर गर्न आईआरएस र युएससीआईएसले अनुरोध गरेको छ ।
करदाता र भर्खरै अमेरिकामा आएका आप्रवासीहरुलाई लक्ष्यित गरेर अमेरिकाभर फोनमार्फत भइरहेका ठगीका घटनाबारे आन्तरिक राजस्व सेवा आईआरएस ग्राहकहरुलाई सावधान गराएको छ ।
ठगहरुले फोन गरेर पीडितहरुलाई उनीहरुले आईआरएसलाई रकम तिर्न बाँकी रहेको भन्दै डेबिट कार्ड र वायर ट्रान्सफरमार्फत रकम माग्ने गरेका छन् । यदि पीडितले ठगहरुले भने अनुशार गर्न नमानेमा उनीहरुले पीडितलाई गिरफ्तार गर्ने, डिपोर्ट गर्ने , विजनेश र चालक अनुमति पत्र खारेज गरिदिने सम्मका धम्की दिने गरेका छन् । धेरैजसो समयमा फोनगर्नेहरु रुखो वा होच्याउने प्रकृतिका हुने गर्छन् ।
यस्ता ठगहरुले करदातालाई अमेरिकाका प्राय सबै राज्यहरुमा निशाना बनाउने गरेका छन् । आईआरएसले फोन मार्फत कहिले पनि क्रेडिट कार्ड नम्बर नमाग्ने जनाएको छ । यदि कसैले आफू आईआरएसबाट भन्दै फोन गरेर प्रहरीबाट गिरफ्तार गराउने, डिपोर्ट गराउने वा लाइसेन्स खारेज गरिदिने धम्की दिन्छ भने त्यो आईआरएसको आधिकारिक फोन नभएको संकेत रहेको आईआरएसको भनाई छ ।
ठगहरुले नक्कली नाम र नक्कली आईआरएस ब्याज नम्बर प्रयोग गर्छन् । उनीहरुले आफूलाई चिनाउन सामान्यतया प्रचलित नामहरु वा थरहरु प्रयोग गर्छन् । ठगहरुले सोसल सेक्युरिटी नम्बरका अन्तिम चार अंकहरु भन्न पनि सक्छन् । ठगहरुले फोन आइआरएसबाटै भएको भान पार्न कलर आइडीमा आईआरएसको टोल फ्रि नम्बर देखिने प्रविधिको प्रयोग गर्छन् । ठगहरुले कहिलेकाँही पीडितलाई नक्कली इमेल पठाएर फोनमा कुरा गर्ने वातावरण समेत बनाउने गरेका छन् । पीडितहरुले पाश्र्वमा अरु यस्तै प्रकारका फोनकलको आवाज समेत सुन्न सक्छन् किनभने ठगहरुले पीडितलाई आश्वस्त पार्न पृष्ठभूमिमा त्यस्तो आवाज बनाएका हुन्छन् ।
यदि तपाईले आईआरएसबाट भन्दै त्यस्ता नक्कली फोनकल पाउनुभएमा आईआरएसमा सम्पर्क गर्नुहोला । यस्ता नक्कली फोनकलबारे तपाईले कर प्रशासनका लागि कोष अनुसन्धान अधिकारीको कार्यालयमा जानकारी गराउन सक्नुहुनेछ । तपाई आफू यसको शिकार हुनुभएको छ भने तपाईले फेडरल ट्रेड कमिशनमा सम्पर्क गर्न सक्नुहुन्छ ।