यी हुन् ह्वाइटहाउसका टास्क फोर्स सदस्य डाक्टर फाउचीसहित कोभिड हिरोबाट न्युयोर्कमा सम्मानित नेपाली
प्रकाशित मिति : कार्तिक २६, २०७७ बुधबार
मंगलबार अमेरिकाका बरिष्ठ सरुवा रोग विशेषज्ञ तथा ह्वाइटहाउसको कोरोना भाइरस टास्क फोर्सका सदस्य एन्थोनी फाउची सहित केही नेपालीहरुलाई समेत न्युयोर्कको ब्रुकलिनमा कोभिड हिरो सम्मान प्रदान गरियो । ब्रुकलिन बोरो प्रेसिडेण्ट एरिक आडम्सले यस्तो सम्मान प्रदान गरेका हुन् । ब्रुकलिन बोरो हल अगाडि गरिएको कार्यक्रममा सम्मानित हुनेमा नेपाली संचारकर्मीदेखि सामाजिक अभियन्तासम्म थिए ।
सम्मानित हुनेमा न्युयोर्कमा कोरोना महामारीमा खटेका उर्गेन शेर्पा, आनन्द बिष्ट, डा बिष्णुमाया परियार, लोक चेम्जोंग लगायत रहेका छन् । शेर्पा किदुग अमेरिकाका अध्यक्ष उर्गेन शेर्पाले कोरोना महामारीका बेलामा अग्रपंक्तिमा रहेर काम गरेका थिए ।
न्युयोर्कमा कोरोनाबिरुद्ध ‘कम्युनिटी फस्ट रेस्पोण्डर’ शेर्पा किदुग र सारथी उर्गेन शेर्पा
त्यस्तै आनन्द बिष्टले नेतृत्व गरेको कोरोनाबिरुद्ध सचेतना एवं सहयोग समुहले कोरोनाको महामारीको बेलामा उल्लेख्य काम गरेको थियो ।
न्युयोर्कमा कोरोना प्रभावितको सहयोगमा बेतलबी फ्रन्टलाइनर आनन्द बिष्ट
त्यस्तै डा बिष्णुमाया परियार महामारीमा नेपाली विद्यार्थीहरुदेखि समस्यामा परेका अन्य नेपाली समुदायका व्यक्तिलाई सहयोगमा जुटेकी थिइन् ।
त्यस्तै कोरोना महामारीमा खसोखासले सुचना सम्प्रेषणमा गरेको योगदानका लागि प्रधानसम्पादक किशोर पन्थी र अँग्रेजी सम्पादक राजन थपलिया सम्मानित भए । त्यस्तै कोरोना महामारीमा समाचार सम्प्रेषणमा खटेका नेपाली संचारकर्मी अकुर लुईटेलपनि सम्मानित भए ।
खसोखास यसअगाडि सिटी युनिभर्सिटी अफ न्युयोर्कको डिजिटल फस्ट रेस्पोण्डरको सुचीमा आप्रवासी समुदायलाई सुचना सम्प्रेषण गर्ने न्युयोर्कका टप ४ मिडियामा छनौट भएको थियो भने अमेरिकाभरका मिडियाहरुमा भने आप्रवासी समुदायलाई सुचना सम्प्रेषण गर्नेमा खसोखास टप ५० भित्र परेको थियो ।
आप्रवासीलाई समाचार दिने न्युयोर्कका टप ४ मिडियामा खसोखास, अमेरिकाभरमा ५० भित्र
सम्मानित हुने एन्थोनी फाउची न्युयोर्कको ब्रुकलिनमा जन्मिएका र हुर्किएका थिए । उनले उक्त सम्मान स्वीकार गर्दै कोरोनाबिरुद्धको भ्याक्सिन एकदमै नजिक रहेको आशा व्यक्त गरेका छन् । कार्यक्रममा बोल्दै फाउचीले भ्याक्सिन छिट्टै आउँदै गरेको बताएका छन् । उनले भने -‘भ्याक्सिन आउँदैछ । हामीले यो सबैबाट एकसाथ मुक्ति पाउँदैछौं ।’
फाउचीलाई विज्ञान र कारणको च्याम्यिनका रुपमा सम्मान गरिएको बु्रकलिन बोरो प्रेसिडेण्ट एरिक आडम्सले बताए । झण्डै २६ लाख जनसंख्या भएको ब्रुकलिन अमेरिकाको चौथो ठूलो सिटी हो । उक्त सिटीले मंगलबार दिउसो १२ बज्नु अगाडि फाउची लगायतलाई सम्मान गरेको हो ।
फाउचीले अरु हिरोहरुसँगै सम्मानित हुन पाउँदा आफूलाई निकै खुशी लागेको बताए । उनले आफ्नो जवानीको समय स्मरण गर्दै ब्रुकलिन आफ्नो डीएनएमा भएको बताए । आफूलाई कसैले वासिंटनमा भइरहेको सबैचीजमा कसरी माथि राख्छस् भनेर सोध्दा ब्रुकलिन शशक्त रहेको बताउने गरेको फाउचीले बताए । फाउचीले यसो भन्दा तालीको गडगडाहट भएको थियो ।
फाउचीले भयानक कोरोना नियन्त्रणमा ल्याउन सकेकोमा न्युयोर्कबासीलाई बधाई समेत दिए । फाइजरको भ्याक्सिन ९० प्रतिशत प्रभावकारी रहेको समाचार आए लगत्तै फाउचीले गरेको सम्बोधनमा भ्याक्सिनको विषयलाई समेटिएको थियो ।