केन्द्रीय समिति बैठक बोलाउन माग गर्दै नेकपामा हस्ताक्षर अभियान सुरु
प्रकाशित मिति : असार २१, २०७७ आईतबार
सत्तारुढ नेपाल कम्युनिस्ट पार्टी (नेकपा)मा केन्द्रीय समिति बैठक बोलाउन माग गर्दै हस्ताक्षर अभियान सुरु भएको छ । केन्द्रीय समिति सदस्यहरूले हस्ताक्षर अभियान चलाएका हुन् ।
अहिले नेकपामा स्थायी समिति बैठक चलिरहेको छ । जारी स्थायी कमिटी बैठकमा बहुमत सदस्यले पार्टी र सरकार सञ्चालनमा केपी शर्मा ओली असफल भएको भन्दै प्रधानमन्त्री र अध्यक्ष दुवै पदबाट राजीनामा मागेपछि विवाद चर्केको छ । पछिल्लोपटक नेकपामा देखिएको विवाद फुटको संघारमा पुगेको छ । विवादका कारण स्थायी कमिटीको बैठकसमेत भोलिसम्मका लागि स्थगित भएको छ ।
पार्टी एकताका पक्षमा दबाब दिन हस्ताक्षर अभियान सुरु गरेको एक केन्द्रीय नेताले जानकारी दिए । शनिबार बैठक माग गर्ने ५३ केन्द्रीय सदस्यले जुम मिटिङ गरेका थिए । केही दिन यता केन्द्रीय कार्यालयमा पार्टी धुम्बाराहीमा एकताको लागि धर्ना दिंदै आएका नेताहरु आजैदेखि हस्ताक्षर अभियानमा लागेका हुन् ।