अमेरिकाबाट २४६ नेपाली काठमाडौं प्रस्थान, चार्टड भनेर चर्को भाडामा कतार एयरवेजको नियमित उडान
प्रकाशित मिति : असार ११, २०७७ बिहीबार
अमेरिकाबाट २४६ जना नेपाली लिएर आज कतार एयरवेजको विमान दोहाका लागि प्रस्थान गरेको छ । ती नेपालीहरुलाई दोहाबाट काठमाडौं लगिने जनाइएको छ ।
अमेरिकामा रोकिएका नेपालीलाई चार्टड विमानबाट लगिने भन्दै प्रतिव्यक्ति १६ सय डलरका दरले टिकट काटिएपनि नियमित उडानमार्फत दोहा लगिएको खुलासा भएको छ । यो भाडादर अन्य समयको दुईतर्फी भाडादरभन्दा दोब्बर हो । न्युयोर्कबाट १० जना नेपालीहरु नियमित उडानमार्फत दोहातर्फ गएको र दोहा पुगेपछि उनीहरुलाई नेपाल जाने उडानमा राखिने जनाइएको छ ।
त्यस्तै टेक्सासबाट २३६ जना नेपालीहरु लिएर कतार एयरवेजको क्वुआर ७३० नम्बरको उडान स्थानीय समय अनुशार आज बेलुका ६ बजेर ४८ मिनेट जाँदा टेक्सास फोर्ट वर्थ विमानस्थलबाट दोहातर्फ प्रस्थान गरेको छ । कतार एयरवेजको वेवसाइट अनुशार उक्त उडान जुन २६ मा बेलुका ५ बजेर ६ मिनेट जाँदा दोहामा अवतरण गर्नेछ ।
उक्त उडान अमेरिकाबाट दोहा जाने नियमित उडान रहेको कतार एयरवेजको वेवसाइटमा उल्लेख छ । उक्त विमानस्थलबाट हरेक दिन बेलुका ६ बजेर १० मिनेटमा कतार एयरवेजको विमान दोहा जाने तालिका रहेको छ । आजको उडानमा नेपालीबाहेक अन्य यात्रुहरुलाई चढाएको वा नचढाएकोबारे केही जानकारी प्राप्त भएको छैन ।
कतार एयरवेजले जुन २३ मा वासिंटन डिसीबाट नेपालीहरु लिएर चार्टड उडान गर्ने बताइएको थियो । तर प्रयाप्त टिकट नविकेपछि उक्त उडान रद्द गरिएको थियो । टेक्सास जान असुविधा भएपछि केही यात्रुलाई न्युयोर्कबाटै नियमित उडानबाट पठाइएको छ ।
यी उडानहरु नियमित उडान भए नभएकोबारे आफूलाई केही जानकारी नदिइएको न्युयोर्कमा रहेको नेपाली महावाणिज्यदूतावासले जनाएको छ ।