पोखराको बजेट ६ अर्ब १९ करोड
प्रकाशित मिति : असार १०, २०७७ बुधबार
पोखरा महानगरपालिकाले आगामी आर्थिक वर्ष २०७७-०७८ को लागि ६ अर्ब १९ करोड रुपैयाँको बजेट ल्याएको छ ।
पोखरा सभागृहमा पोखरा महानगरपालिकाका उपमेयर मञ्जुदेवी गुरुङले नगरसभामा २०७७-०७८ को वार्षिक राजस्व र व्ययको अनुमान (बजेट) पेश गरेकी हुन् ।
उनले पेश गरेको बजेट ६ अर्ब १९ करोड रुपैयाँमध्येमा संघ सरकारले दुई अर्ब ५२ करोड ६० लाख रुपैयाँ अनुदान दिएको छ ।
यस्तै प्रदेशको १० करोड ५९ लाख रुपैयाँ पनि समावेश छ । कुल अन्तरसरकारी वित्तीय हस्तान्तरणबाट प्रदेशले २ अर्ब ६३ करोड रुपैयाँ अनुदान पाएको छ ।
यस्तै, अन्तरसरकारी अख्तियारीबाट ८५ करोड, राजस्व बाँडफाँटमा संघबाट ३० करोड र प्रदेशबाट ४ करोड सहित कुल ३५ करोड रुपैयाँ महानगरले पाएको छ । बाँकी २ अर्ब ३६ करोड आन्तरिक स्रोतबाट उठाउने लक्ष्य लिएको छ ।
महानगरले ल्याएको बजेटबाट चालुतर्फ ३ अर्ब २० करोड रुपैयाँ र पूँजीगततर्फ २ अर्ब ८९ करोड रुपैयाँ विनियोजन गरिएको छ ।
प्रतिशतका आधारमा चालुतर्फ ५२ र पूँजीगततर्फ ४८ प्रतिशत बजेट छुट्याइएको छ । यसमध्ये, प्रशासनिकमा १ अर्ब ५८ करोड र कार्यक्रमतर्फ ४ अर्ब ६१ करोड रुपैयाँ विनियोजन गरिएको छ ।