अमेरिकाबाट जुन १७ र २५ मा नागरिक फिर्ता लैजाने नेपाल सरकारको तयारी
प्रकाशित मिति : जेष्ठ २८, २०७७ बुधबार
नेपाल सरकारले कोरोना भाइरसका कारण महिनौंदेखी अमेरिका रोकिएका आफ्ना नागरिक फिर्ता लैजाने भएको छ । नेपाल सरकारले यही जुन महिनामा दुई पटक गरी आफ्ना नागरिक फिर्ता लैजाने तयारी गरेको छ ।
सरकारको प्रस्तावित मिति अनुसार, यही जुन महिनाको १७ तारिख र २५ तारिखका दिन अमेरिकाबाट नेपालका लागि उडान हुनेछ । प्राप्त जानकारी अनुसार १७ तारिखका दिन बिदेशी बिमान कम्पनीले उडान भर्ने छ भने २५ तारिख नेपाल एयरलाइन्सले अमेरिकाबाट नेपालका लागि उड्नेछ । दुवै उडानका लागि रकम भने तोकिएको छैन् । यसरी बिमान चड्ने व्यक्तिको कोरोना परिक्षण भने अनिवार्य गरिएको हुनुपर्नेछ । र्यापिड टेस्ट या पिसिआर टेस्ट गरिएको हुनुपर्ने प्रावधान राखिएको छ ।
राजदूतावासले कोरोना परिक्षणका लागि तयारी गरिरहेको जनाइएको छ । साथै दूतावासले नेपाली नागरिकलाई सम्पर्कमा रहिरहन भनेको छ । कोरोना महामारीका कारण अमेरिकामा रोकिएका नेपाली नागरिकले महिनौंदेखी सरकार तथा सम्वन्धीत निकायसंग हारगुहार गरिरहेका थिए ।
सरकार आफैले मिति तोक्दा हामी निकै खुसी भएका छौं, अमेरिकामा रहेका नेपाली नागरिक शान्ताराज बतासले भने, कति बस्नुपर्ने हो भन्ने अन्यौंल थियो, अब केही राहत महशुस भएको छ । यसरी अमेरिकामा थुनिएका नेपाली नागरिकले भिषा लगायतका थुप्रै समस्या थपिँदै गएको गुनासो गर्दै आएका थिए ।
