न्युयोर्कमा ‘अन्क्लेम्ड’ हुन पाएन झकबहादुर गुरुङको शव, दाहसंस्कारको तयारी
प्रकाशित मिति : जेष्ठ २८, २०७७ बुधबार
न्युयोर्कको एल्महस्र्ट अस्पतालमा मृत्यु भएका झकबहादुर गुरुङको शव मेरिल्याण्ड राज्यको संसदमा प्रतिनिधित्व गर्ने सांसद ह्यारी भण्डारीको पहलमा ‘अन्क्लेम्ड’ हुनबाट जोगिएको छ । निश्चित समयभित्र कसैले पनि दावी नगरेका शवहरु सामुहिक चिहानमा दफनाइने गरिएकोमा गुरुङको शव अन्तिम अवस्थामा ‘अन्क्लेम्ड’ हुनबाट जोगिएको हो ।
दुईघण्टामात्र ढिलो भएको भए शव वेवारिस बनेर सामुहिक दाहसंस्कारको लागि लैजान लागिएकोमा समयमै द गुरुङ सोसाइटी युएसएले दावी गर्न सफल भएकाले उचित दाहसंस्कारको बन्दोबस्त भएको प्रवासी नेपाली एकता मञ्च अमेरिकाका अध्यक्ष टेक गुरुङले जानकारी दिए । तमु परिवारका अध्यक्ष मनिता गुरुङ र सामाजिक व्यक्तित्व यादव बास्तोलाको सहयोगमा र सांसद ह्यारी भण्डारीको विशेष पहलमा टेक गुरुङले सोमबार शव शनाखत गरेका हुन् ।
अहिले दाहसंस्कारका लागि द गुरुङ सोसाइटी अमेरिकाका अध्यक्ष विजय गुरुङको नेतृत्वमा आर्थिक संकलन अभियान सुरु गरिएको छ । मृतक झोक बहादुर गुरुङको न्युजर्सीमा रहेको रुबी मेरोरियल फ्युनेरल होममा दाहसंस्कार गरिने भएको छ भने शव फ्युनेरल होममा लगिसकिएको छ ।
सिन्धुपाल्चोकको मेलम्ची ३ घर भएका ६० बर्षका झकबहादुर गुरुङका ६ छोरी, एक छोरा र श्रीमति छन् । उनीहरुमध्ये कोही पनि अमेरिकामा नरहेको तर दाहसंस्कारका लागि श्रीमतिले स्वीकृतिपत्र पठाइसकेको जनाइएको छ । झण्डै ८ वर्ष अघि अमेरिका आएका गुरुङ न्युयोर्कको म्यानहटनमा रहेको जापनिज रेस्टुरेन्टमा काम गर्दै आएका थिए भने क्वीन्समा बस्दै आएका थिए ।
उनी अमेरिकामा एक्लै बस्दै आएका थिए । अमेरिकामा नजिकको आफन्त नहुँदा शव दावी गर्न र दाहसंस्कारमा समस्या भएको थियो । अबको केही दिनमा नै उनको सम्मानपूर्वक दाहसंस्कार गरिने टेक गुरुङले जानकारी दिए ।
झकबहादुर गुरुङकी कान्छी छोरीको हालैमात्र मुटुको अपरेशन गरिएको र परिवारको एकमात्र आम्दानीको स्रोत झकबहादुरको निधन भएका कारण उहाँको परिवार शोक र संकटमा परेको छ । परिवारको सहयोगका लागि गोफण्डमीमा आर्थिक संकलन सुरु गरिएको छ ।
मार्चको दोश्रो साता कोरोनाको महामारी फैलिएयता न्युयोर्कमा १३ जनाको मृत्यु भइसकेको छ । ३ महिनाको बीचमा अनिल लिम्बु, थोक्मे विष्ट, अजय छोंचु, निमा शेर्पा, सोनाम लामा, विष्णु राई, राजकुमार थापा, पवन मल्ल, महेश अमात्य, पेम्बा रिन्जी लामा, शायलक बुढामगर र मदन थापाको मृत्यु भइसकेको छ । तर सबैको मृत्यु कोरोनाका कारण भने भएको होइन ।
सोमबारमात्र न्युयोर्कको लङ आइल्याण्ड निवासी ४० बर्षका नेपाली मदन थापाको मृत्यु भएको थियो । आइतबार जन्मदिन मनाएर सुतेका थापा सोमबार आफ्नै विस्तारामा मृत भेटिएका थिए । आफ्नो सालासँग नयाँ अपार्टमेन्टमा सरेको भोलिपल्ट नै थापाको निधन भएको थियो ।